Aqtóbede bıylǵy jyl «Balalar jyly» dep jarııalandy
AQTÓBE. QazAqparat - Bıyl Aqtóbede balalar jyly jarııalandy. Bul týraly Aqtóbe oblysynyń aktıvinde óńir basshysy Berdibek Saparbaev aıtty, dep habarlaıdy QazAqparat tilshisi.
Aqtóbe oblysy aktıvinde Elbasy Joldaýy talqylandy. Jıynǵa oblys, qalalyq máslıhat depýtattary, kásipkerler men memlekettik mekeme basshylary, úkimettik emes uıym, etnomádenı birlestik ókilderi qatysty. Óńirdiń ekonomıkalyq-áleýmettik kórsetkishterin atap ótken óńir basshysy Berdibek Saparbaev ótken jyly 437 mıllıard teńge ınvestıtsııa quıylǵanyn atap ótti. Bul 2016 jylmen salystyrǵanda 21 paıyzǵa kóp. Bıyl ınvestıtsııa 500 mıllıard teńge bolýy kerek. Barlyq múmkindikter bar, ınvestorlarmen kelisim jasaldy.
«Memleket basshysynyń Joldaýdaǵy 10 mindetiniń oryndalýy adamı kapıtalǵa baılanysty. Bilim salasynda atqarylyp jatqan ister mol. 2020 jylǵa deıin balalardyń bárin baqshamen qamtamasyz etý kerek. Qazir Aqtóbe oblysy boıynsha balabaqshamen qamtý deńgeıi 94 paıyzǵa jetip tur. Bıyl memlekettik-jekeshelik seriktestik aıasynda balabaqsha salý jumysyn jalǵastyramyz. Al úsh aýysymda, apatty jaǵdaıdaǵy mektepter 2020 jylǵa deıin joıylady. Ótken jyly 15 mektep paıdalanýǵa berilip, bıyl 26 mekteptiń qurylysy júrip jatyr»,- dedi oblys ákimi Berdibek Saparbaev.
Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýyn talqylaý kezinde óńir basshysy bıylǵy jyl «Balalar jyly» dep jarııalanǵanyn aıtty.
«Bıyl Aqtóbede balalar jyly dep jarııalandy. «Baqytty balalyq shaq» atty jumysymyzdyń qorytyndysy Balalardy qorǵaý kúni jarııalanady. Balalardyń óner, mádenıet, sportpen aınalysyp, bilim alýy úshin ne atqarylǵan qaraımyz. Kásipkerlermen birge aýla klýbyn, oıyn alańyn salý jumysy atqarylady. Kásipkerler qoldaıdy, balalarǵa barlyq jaǵdaı jasalady. Sol kezde tártip bolady, qylmys azaıady»,- dedi Berdibek Saparbaev.
