Aqtóbede bıyl kámeletke tolmaǵandarǵa qatysty 39 qylmystyq is qozǵaldy
AQTÓBE. QazAqparat – Aqtóbede bıyl kámeletke tolmaǵandarǵa qatysty 39 qylmystyq is qozǵalǵan. Polıtsııa quqyqbuzýshylyqty boldyrmaý maqsatynda «Stýdent» sharasyn bastady, dep habarlaıdy QazAqparat tilshisi.
Jańa oqý jyly dástúrli formatta bastalyp, tek mektep oqýshylary emes, kolledj ben ýnıversıtet stýdentteri qazir bilim ordasynyń ǵımaratynda oqyp júr. Polıtsııa qyzmetkerleri stýdentter arasyndaǵy quqyqbuzýshylyqtyń aldyn alý maqsatynda «Stýdent» sharasyn bastady.
«Kolledj jáne orta mektep qabyrǵasynda kámeletke tolmaǵandardyń birin-biri bopsalaý, tonaý, toptasyp tóbelesý derekterin boldyrmaý maqsatynda Aktóbe qalalyq jergilikti polıtsııa qyzmeti basqarmasynyń uıymdastyrýymen «Stýdent» jedel profılaktıkalyq is-sharasy ótkizilip jatyr. Janynda ata-anasy joq, qalada jaldamaly páterlerde, týma-týystarynda jáne kolledj jataqhanalarynda turyp jatkan kámeletke tolmaǵandardyń turǵylyqty mekenjaıyn tekserip, turmystyq jaǵdaılaryna zertteý júrgizildi. Bıyl oblysta kámeletke tolmaǵandar arasynda 39 qylmystyq is tirkeldi. Sonymen birge 4 myńǵa jýyq ákimshilik quqyqbuzýshylyq anyqtaldy», - dedi oblystyq PD baspasóz qyzmetiniń jetekshisi Erbolat Sarqulov.
