Aqtóbede bıyl 9 aýylǵa gaz beriledi
Aqtóbe oblysynyń ákimi qoǵamdyq keńes múshelerimen, oblystyq, qalalyq máslıhat depýtattarmen, BAQ ókilderimen, áleýmettik jeli belsendilerimen kezdesti. Oblys ákimi Ońdasyn Orazalın óńirdiń áleýmettik-ekonomıkalyq damýy men 2022 jylǵa arnalǵan mindetter jaıly baıandady.
«Men 2019 jyly osy qyzmetke kiriskeli oblystaǵy aýdan ortalyqtary men kóptegen aýylda bolyp, halyqtyń jol jóndeý, gazdandyrý, sýmen jabdyqtaý, jumyspen qamtý jáne tabysty kóterý sııaqty ózekti suraqtaryn sheshýdi óz mindetime aldym. Osy mindetterdi sheshý sharalarynyń jospary quryldy»,- dedi sharany ashqan oblys ákimi. Jospardy júzege asyrý nátıjesinde 2019-2021 jyldar ishinde 26 eldi meken sapaly aýyz sýmen, 46 aýyl gazben qamtyldy.
«Bıyl 50 aýyldy sapaly sýmen, 9 aýyldy gazben qamtýdy josparlap otyrmyz. Osylaısha halyqtyń 98,5 % sýmen, 93,4 % gazmen qamtylatyn bolady»,- dedi óńir basshysy Ońdasyn Orazalın.
2018 jyly oblys boıynsha jaqsy jáne qanaǵattanarlyq jaǵdaıdaǵy joldardyń úlesi 53% qurady. Sońǵy úsh jylda bul kórsetkish 66,7% jetti. Sonymen birge jyl saıyn keminde 300 shaqyrym jol jóndeledi. Bıyl jalpy uzyndyǵy 752 shaqyrym bolatyn 201 jobany júzege asyrý josparlanyp otyr. Bul maqsatqa 32,3 mlrd teńge aýdarylady. Áleýmettik salada da oń dınamıka baıqalady. Sońǵy úsh jylda oblysta 30 densaýlyq saqtaý nysany salynsa, onyń ishinde Aqtóbedegi perınataldy ortalyq, 32 mektep, bes dene shynyqtyrý-saýyqtyrý kesheni, 3 basseın, 60-tan asa sport alańy bar.
Aýyl sharýashylyǵyndaǵy óndiristiń de ósimi turaqty. Ónim kólemi 2019 jyly 275 mlrd teńge bolsa, 2021 jyly 376 mlrd teńgege ósken. Sharýalarǵa arnalǵan sýbsıdııa kólemi eki esege artty. Atap aıtqanda, byltyr olar 23 mlrd teńge sýbsıdııa alsa, onyń ishinde 8,3 mlrd. teńge mal azyǵyna aldy. 2021 jyldyń qorytyndysy boıynsha ónerkásip óndirisinde 102,7 %, turǵyn úı 113,6 %, ınvestıtsııa tartýda 120,6 %. ósim baıqalady.
«Búginde álemde, atap aıtqanda, kórshi elderde ne bolyp jatqanyn bárimiz bilemiz. Ókinishke qaraı mundaı aýqymdy oqıǵalar bizdiń respýblıkamyzǵa ǵana emes, bizdiń óńirimizge de áser etip jatyr. Alaıda, biz halyqtyń qaýipsizdigi men ál-aýqatyn qamtamasyz etý úshin barlyq kúsh-jigerimizdi salatyndyǵymyzǵa tolyqtaı sendire alamyn. Sondaı-aq, «Estýshi memleket» tujyrymdamasy sheńberińde atqarylyp jatqan birlesken jumys arqasynda, biz óńirimizdi toqyraýǵa ushyratpaı, onyń ósip-órkendeýin jáne gúldenýin qamtamasyz ete alamyz. Osy jolda bir jaǵadan bas, bir jeńnen qol shyǵaryp birlese tize qosyp eńbek etý árqaısymyzdyń azamattyq paryzymyz»,- dep atap ótti O.Orazalın.
