Aqtóbede bıyl 722 myń gektar alqapqa egin egiledi
AQTÓBE. QazAqparat - Aqtóbede bıyl 722 myń gektar jerge egin egiledi. Kóktemgi dalalyq jumystaryna daıyndyq júrip jatyr, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbede kóktemgi dalalyq jumystaryna daıyndyq júrip jatyr. Bıyl egistik jerlerdiń jalpy aýmaǵy 722,3 myń gektardy quraıdy. Dándi daqyldarǵa 375 myń, maıly daqyldarǵa 85,2 myń, kartopqa 6,3 myń, basqa kókónisterge 4,5 myń gektar jer bólý josparlanyp otyr.
Aqtóbe oblysy ákiminiń orynbasary Jaqsyǵalı Imanqulovtyń aıtýynsha, búginde tuqymnyń 82% daıyn. Aýyl sharýashylyǵy tehnıkalarynyń daıyndyǵy 92 %-ǵa jetti.
Oblys ákimi Ońdasyn Orazalın kóktemgi dalalyq jumystardy ýaqytyly qarjylandyrýdy jáne sharýalarǵa sýbsıdııa berýdi, onyń ishinde joǵary reprodýktsııaly tuqymdardy, pestıtsıdter men mıneraldy tyńaıtqyshtardy satyp alýǵa jumsalǵan shyǵyndardyń bir bóligin óteýdi tapsyrdy. Sondaı-aq, óńir basshysy aýyl sharýashylyǵy taýarlaryn óndirýshilerdi dızel otynymen qamtýdy erekshe baqylaýǵa alýdy mindettedi. Bıyl Aqtóbe oblysynyń kóktemgi dalalyq jumystaryn júrgizýge 9,5 myń tonnadan asa arzandatylǵan dızel otyny bólindi.
Budan bólek, Ońdasyn Orazalın jem-shóp qoryn keńeıtý boıynsha josparlanǵan jobalarǵa erekshe kóńil bólýdi, olardyń tolyq ári sapaly júzege asyrylýyn qamtamasyz etýdi talap etti.
