Aqtóbede biryńǵaı «iPhone» urlaýmen aınalysqan kúdikti ustaldy
AQTÓBE. QazAqparat – Aqtóbelik tek «iPhone» markaly uıaly telefonyn satyp alamyn dep páterge shaqyryp, keıin qashyp ketip otyrǵan. Kúdikti ustalyp, qamaldy, dep habarlaıdy QazAqparat tilshisi.
Kúdikti medıtsınalyq maska kıip, bet-álpetin jasyrǵan. Polıtsııa izdeý sharasy kezinde 34 jastaǵy qala turǵynyn ustady.
«Ol tótenshe jaǵdaı rejımin paıdalanyp, Álııa Moldaǵulova dańǵylyndaǵy páterdi bir táýlikke jalǵa alǵan. Sodan keıin «iPhone» markaly uıaly telefonyn satýǵa shyǵarǵan adamdarmen baılanysyp, páterge shaqyrdy. Ony as úıge kirgizip, «telefondy áıeline kórsetemin» degen syltaýmen páterden shyǵyp, qashyp ketken. Shyǵyn 705 myń teńgeni qurady. Taǵy birde 21 jastaǵy aqtóbelikti aldady. Alaıaq medıtsınalyq maskamen jasyrynyp, «Batys-2» shaǵyn aýdanynda páter jaldaǵan. Dál osy jolmen telefondy alyp qashty. Shyǵyn - 365 myń teńge. Qazirgi kúni kúdiktige qatysty 6 aryz kelip tústi. Ol buryn birneshe ret sottalǵan, tergeý ızolıatoryna qamaldy. Atalǵan faktiler boıynsha QK 190-baby 3-bólimi boıynsha sotqa deıingi tergeý bastaldy. Oblystyq polıtsııa departamenti osy alaıaqtyń qolynan zardap shekken aqtóbelikterdiń 87053807750, 102 telefondaryna habarlasýyn nemese №1 qalalyq polıtsııa bóliminiń kezekshi bólimine ótinish bildirýdi suraıdy», - dedi oblystyq PD baspasóz qyzmetiniń jetekshisi Erbolat Sarqulov.
