Aqtóbede birneshe júk kóligi soqtyǵysty
AQTÓBE. QazAqparat – Samara-Shymkent tasjolynda tórt kólik soqtyǵysty. Kólik tıegen júk kóligi joldan shyǵyp ketti, dep habarlaıdy QazAqparat tilshisi.
Samara-Shymkent tasjolynyń 619 shaqyrymynda 4 kólik soqtyǵysyp qaldy.
Oblystyq PD baspasóz qyzmetiniń habarlaýynsha, avtokólik tıegen «Reno» markaly júk kóliginiń júrgizýshisi, Grýzııa azamaty Almaty qalasyna avtokólikterdi tasymaldaýmen aınalysady. Ol taıǵaqty eskermeı dál aldynda ózi sekildi kólik tıep kele jatqan júk kóligimen soqtyǵysady. Saldarynan júk kólikteri baǵytyn ózgertip, qarsy baǵytta kele jatqan «Mersedes» markaly júk kóligimen soqtyǵysty.
«Barlyǵy tórt kólik soqtyǵysty. Jol-kólik oqıǵasy saldarynan «Mersedes» markaly júk kóliginiń júrgizýshisi túrli dene jaraqatymen Hromtaý qalasynyń ortalyq aýrýhanasyna jatqyzyldy. Jol-kólik oqıǵasy deregi boıynsha tergeý júrip jatyr»,- dedi oblystyq PD baspasóz qyzmetiniń jetekshisi Erbolat Sarqulov.
