Aqtóbede birneshe ret toı ótkizgen meıramhanalar anyqtaldy

AQTÓBE. QazAqparat – Jyl basynan beri Aqtóbede kásipkerler men túrli mekemege 660 aıyppul salyndy. Óńirde birneshe ret toı ótkizgen meıramhanalar da anyqtaldy, dep habarlaıdy QazAqparat tilshisi.

Aqtóbe oblystyq sanıtarııalyq-epıdemıologııalyq baqylaý departamentine mobıldi monıtorıng toptardan jáne jergilikti polıtsııa qyzmetinen júzdegen materıal tústi. Nátıjesinde 70,6 mıllıon teńgege 660 aıyppul salyndy.

Karantın rejımin buzǵandar qatarynda meıramhana, dúken, laýndj bar jáne taǵy basqa nysandar bar.

«Sońǵy apta ishinde departamentke 110 materıal tústi. Onyń ishinde, 41 materıal qaraldy, qalǵany tekserilip jatyr. Atap aıtqanda, «Dýmash», «Aq bosaǵa», «Juldyz», «Manas» meıramhanalarynda bir aptada eki ret saltanatty shara ótkizildi. Oǵan qosa «Aq jeleń», «Asyljan», «Báıterek», «Úısin», «Nur», «Dýlat» restorandary da karantın shekteýin buzdy. Maska taǵý talabyn saqtamaǵany úshin «Kýtýzovskıı» shaǵyn marketine, «Sadaq» dúkeni, «Word class» jattyǵý zalyna, «Zoloto» karaoke bary men «Mega planeta» dúkenine buzýshylyqty joıý jóninde uıǵarymdar berildi», - dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.