Aqtóbede birneshe kúnnen beri strategııalyq mańyzdy nysandarda kúzet kúsheıdi
Aqtóbe oblysynda 4 maýsym kúni «Dabyl-2018» komandalyq-shtabtyq oqý jattyǵýy bastaldy. Alǵashqy kúni qalada, keıin Alǵa, Muǵaljar aýdanynyń aýmaǵynda, Qandyaǵash, Jem qalalarynda kúni-túni jattyǵý ótkizildi. Búgin Mártók aýdanyndaǵy shekarada jalǵasty.
«Jattyǵý maqsaty - tótenshe jaǵdaılar kezindegi áleýetti qurylymdar men jergilikti atqarýshy organdar arasyndaǵy kelisimdilikti arttyrý. Kúshter men quraldardyń qyzmettik-jaýyngerlik daıyndyǵyna, olardyń ózara áreketteriniń kelisimdiligi men rettelýshiligine, sol sııaqty olardy basqarý men ózara baılanysyn uıymdastyrý deńgeıine tekserý júrgiziletin bolady.
Mundaı oqý-jattyǵýlar jyl saıyn josparly negizde ótkiziledi. Jattyǵýlar kezinde áýejaı men temirjol vokzaldaryndaǵy tártiptik-ótkizýdi baqylaý kúsheıtiledi. Oqý-jattyǵý sharalaryn ótkizý, áskerı jáne arnaıy tehnıkanyń jumysy kezinde kólik keptelisteri týyndaýy múmkin», - dep habarlady Daǵdarysty jaǵdaılar jónindegi óńirlik jedel shtab.
Aıta keteıik, oqý-jattyǵý jıyndarynyń josparyna sáıkes strategııalyq jáne qaýipsizdikti qamtamasyz etý nysandary, sonymen birge buqaralyq aqparat quraldarynyń keńseleri qorǵaýǵa alynyp, kúzet kúsheıdi.
«Oqý-jattyǵý jıyndary kúndizgi jáne túngi ýaqytta júrgiziletin bolady. Ótkizilip jatqan jattyǵýǵa túsinistikpen qarap, quqyq qorǵaý organdary ókilderiniń talaptaryn oryndaýdy, qaýipsizdik sharalaryn saqtaýdy suraımyz. Ári jol júrý barysynda kólik qozǵalysyn erte josparlap jáne jalǵan aqparat pen arandatýshylyq qaýesetterdi taratýǵa jol bermeý qajet», - dep habarlady jedel shtab ókilderi.
