Aqtóbede birqatar sheneýnikter qamaýǵa alyndy
Agenttiktiń resmı ókili Nurjan Jaxınniń aıtýynsha, oblystyq ishki ister departamenti bastyǵynyń orynbasary Ańshybaev bıýdjet qarajatyn jymqyrdy degen kúdik bar. 2016-2017 jyldar aralyǵynda Ańshybaev Aqtóbe oblystyq ІІD atynan bir JShS-men kelisimshart jasasqan. Oǵan sáıkes, birqatar nysandarda kúrdeli jáne aǵymdaǵy jóndeý jumystaryn jasaý qajet bolǵan. Sot saraptamasy boıynsha jóndeý jumystary úshin 12 mıllıon teńge tólendi. Biraq eshteńe jasalǵan joq.
«Jalpy Ańshybaevqa jáne ózge de tulǵalarǵa qatysty bıýdjet qarjysyn jymqyrý deregi boıynsha bes qylmystyq is qozǵaldy. Ańshybaev qamaýǵa alyndy», -dedi N.Jaxın Astanada ótken baspasóz máslıxatynda.
Budan bólek, QR AShM Agroónerkásip keshenindegi memlekettik ınspektsııa komıtetiniń Aqtóbe oblystyq ınspektsııasy basshysynyń orynbasary Orynbaev sybaılas jemqorlyqqa jol bergen.
«Ol ósimdikter karantınin buzǵany úshin ákimshilik jaýapqa tartpaımyn dep, kásipkerlerden turaqty túrde para aldy degen kúdik bar. Onymen birge, aýmaqtyq ınspektsııanyń bas mamandary - Qaımoldıev jáne Kóshkimbaev ustaldy. Olar ózara sóz baılasyp, karantınge jatqyzylǵan ónimge tekserý jasamastan fıtosanıtarlyq kýálikterdi jyldam jasaǵany úshin 7-20 myń teńge kóleminde zańsyz syıaqy alyp otyrǵan. Qaımoldıev pen Kóshkimbaev ustaldy jáne ýaqytsha ustaý abaqtysyna qamaldy. Sotqa deıingi tergeý júrgizilýde», - dep atap kórsetti N.Jaxın.
Aıta keteıik, buǵan deıin QR Memlekettik qyzmet isteri jáne sybaılas jemqorlyqqa qarsy is-qımyl agenttigi bólim basshysyn 1,7 mln teńgemen ustaǵany týraly vıdeony jarııalaǵan bolatyn. Atalǵan oqıǵa da Aqtóbe oblysynda bolǵan.