Aqtóbede bir túnde 58 adam qar qursaýynan qutqaryldy
AQTÓBE. QazAqparat - Aqtóbe oblysy boıynsha 8 respýblıkalyq, 7 oblystyq mańyzy bar tas jol jabylyp, bir túnde qar qursaýynda qalǵan 8 tehnıka men 58 adam qutqaryldy.
Olardyń úsheýi jylytý beketterine ornalastyryldy. Osy ýaqytta 8 júk kóligi jol boıynda áli de qalyp otyr. Qardan tazartý jumystary jalǵasýda, dep habarlaıdy «QazAqparat» tilshisi.
Aqtóbe oblysynda qys bastalǵaly avtojoldar alǵash ret jabyldy. Keshe ońtústik-batystan soqqan jeldiń jyldamdyǵy sekýndyna 15-20 metrge deıin jetip, boran soqty. Saldarynan respýblıkalyq mańyzy bar «Aqtóbe-Astrahan» tas jolynyń 177-330 shaqyrymdar aralyǵynda qozǵalys toqtatyldy. Sonymen qatar, «Qandyǵash-Embi-Shalqar-Yrǵyz» baǵytyndaǵy joldary jabyldy. Qazirgi ýaqytta aýa raıy qalypqa tústi. Biraq respýblıkalyq mańyzy bar «Qandyǵash-Embi-Shalqar-Yrǵyz» jáne oblystyq deńgeıdegi «Dóń-Badamsha-Aqtóbe-Orsk» tas joldarynda qozǵalys áli de shekteýli.
«Túni boıy qutqarýshylar tynymsyz jumys istedi. Barlyǵy 8 tehnıka qar qursaýynan shyǵaryldy. Qazirgi ýaqytta Baıǵanın aýdanyndaǵy «Altımýs-Petrolıým» munaı kompanııasyna jaqyn mańynda 8 júk kóligi tur. Joldy qardan tazartý jumystary jalǵasyp jatyr»,- deıdi oblystyq TJD bastyǵynyń orynbasary Qaırat Qasym.
Aıta keteıik, respýblıkalyq mańyzy bar tas joldardy tazartýǵa 64 tehnıka jumyldyrylǵan. Al Aqtóbe qalasy boıynsha jol boıyn 103 kólik tazartýda.
«Aqtóbelik kólik júrgizýshileri tótenshe jaǵdaılar qyzmeti taratqan aqparatqa úlken mán beredi. Olarda úlken tájirıbe bar. Áleýmettik jeli arqyly da taratyp, qyzý talqylady jáne jolǵa shyqpaý týraly aqparatqa túsinistikpen qarady. Joldardyń jabylǵanyn bilgen soń alys saparǵa shyqqan emes. Tek tranzıttik kólikterge habarlama kesh barǵan bolýy kerek. Jolda qalyp qoıǵandardyń bári júk kólikteri bolyp shyqty»,- deıdi Qaırat Qasym.
Altynaı Saǵyndyqova
