Aqtóbede bir táýlikte 7 oqýshydan koronavırýs ınfektsııasy anyqtaldy
AQTÓBE. QazAqparat - Aqtóbede koronavırýs ınfektsııasyn juqtyrǵan adamdar sany artty. Ótken táýlikte 7 oqýshy men 2 stýdentten vırýs anyqtaldy, dep habarlaıdy QazAqparat tilshisi.
«Sary» aımaqtaǵy Aqtóbe oblysynda búginge deıin 4776 adamnan koronavırýs ınfektsııasy anyqtaldy. Ótken táýlikte 40 adam dertke shaldyqty. Onyń 27-sinen vırýstyń sımptomdy túri anyqtaldy.
«Aqtóbe qalasyndaǵy №63, 64, 78 jáne «Aqbóbek» jáne Hromtaý aýdandyq №2 mektep-gımnazııanyń oqýshylarynan vırýs anyqtaldy. 1, 2, 3, 4, 5-synyp jáne mektepke daıarlyq tobynda oqıtyn oqýshylardyń bári offlaın dáris alǵan. Kóbi naýqas adamdarmen qarym-qatynasta bolǵany úshin tekserilip, vırýs juqtyrǵany belgili boldy. Sonymen birge kolledj jáne ýnıversıtet stýdenti de COVID-19 juqtyrǵan. Ekeýi de onlaın oqyǵan»,- dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.
Óńirde qańtar aıynda 265, aqpanda 313, al naýryzda 508 adam vırýs juqtyrǵan. Qazirgi kezde 900-ge jýyq adam úı karantıninde jatyr.
Eske salsaq, Aqtóbe oblysy keshe «sary» aımaqqa kirip karantın sharalary kúsheıtildi.
