Aqtóbede bir táýlikte 19 oqýshydan koronavırýs ınfektsııasy anyqtaldy

AQTÓBE. QazAqparat –Bir táýlikte 19 oqýshydan koronavırýs ınfektsııasy anyqtalyp, 17 synyp oqýshysy karantınge jiberildi. Aqtóbede barlyǵy 279 synyp karantınde, dep habarlaıdy QazAqparat tilshisi.

Aqtóbe oblysy boıynsha bir táýlikte taǵy 97 adamnan koronavırýs ınfektsııasy anyqtaldy. Olardyń arasynda oqýshylar, stýdentter men balabaqsha tárbıeshisi, muǵalimder de bar. Bul týraly óńirlik kommýnıkatsııalar qyzmetinde ótken baspasóz máslıhatynda oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev aıtty.

«Bir táýlikte vırýs juqtyrǵan naýqastardyń 69-y eresekter bolsa, 18-i bala, 10-y jasóspirim. Vırýs juqtyrǵandarmen baılanysta bolǵan 400-den astam adam oqshaýlandy», - dedi Muhtar Serbaev.

Jalpy oblystyq ınfektsııalyq statsıonarlarda 464 adam jatyr. Onyń 60-y jansaqtaý bóliminde. Tynysy tarylǵan 17 naýqas jasandy tynys alý apparatyna qosyldy.

«Qazir 65 júkti áıel, 199 bala baqylaýda bolsa, onyń ishinde úsh bala, 21 júkti kelinshek statsıonarda em qabyldap jatyr. Infektsııalyq kereýet júktemesi 51% qurap otyr. Statsıonarlarǵa túsken adam sany azaıyp, biz aýrýhanalardaǵy kereýet sanyn azaıtyp jatyrmyz. Ázirge eshqaısysy jabylmaıdy», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.

Bir táýlikte 12 adam koronavırýs ınfektsııasynan kóz jumdy.

Aıta keteıik, óńir «sary» aımaqtar qatarynda. Birer kúnde shekteý sharasy jeńildeıdi.