Aqtóbede bir otbasynyń eki balasy sýǵa batyp ketti
Oqıǵa Aqtóbe qalasynda boldy. Saǵat 14:18-da oblystyq tótenshe jaǵdaılar departamentiniń kezekshi-dıspetcherlik bólimine habarlama tústi.
Aqtóbe qalasy Almaty aýdanyndaǵy Zarechnyı-1 turǵyn alabynyń kópir mańynda bir adam sýǵa ketken.
Oblystyq TJD baspasóz qyzmetiniń habarlaýynsha, 18 jastaǵy jigit qaýipti, shomylýǵa tyıym salynǵan jerge sýǵa túsken.
Onyń denesi jaǵadan 10 metr qashyqtyqta, 3 metr tereńdikten tabyldy.
«Aqtóbede saǵat 19:30-da taǵy da habarlama tústi. Zarechnyı-1 turǵyn alabyndaǵy kópir mańynda 2009 jáne 2011 jyly týǵan eki bala sýǵa ketip qaldy. Olardyń denesi 3 metr tereńdikten tabyldy. Ekeýi de bir otbasynyń balasy. Bul jer - sýǵa túsýge tyıym salynǵan aýmaq. Aqtóbe oblystyq tótenshe jaǵdaılar departamenti sýǵa túsýdiń erejesin saqtaýdy suraıdy. Іshimdik iship, jaǵajaıǵa barý qaýipti. Balalardy da kózden tasa qylmaý kerek. Ári jaǵajaı arnaıy ruqsaty bar oryn bolǵany jón»,- dep habarlady oblystyq TJD baspasóz qyzmeti.
Eske salsaq, on kún buryn Aqtóbede bir táýlikte tórt adam sýǵa batyp ketti. Olardyń denesin qutqarýshylar jaǵaǵa shyǵardy.
Aqtóbe qalasy Órleý aýylynda sýǵa túsýge arnalmaǵan orynda bir úıdiń 2006 jylǵy jáne 2004 jylǵy eki adamy sýǵa batyp ketkeni jóninde aqparat kelip tústi.
Oqıǵa ornyna dereý qutqarýshylar jetti. Qutqarýshylar dronnyń kómegimen 16 jastaǵy jasóspirim men 18 jastaǵy azamattyń denesin tapty. Olar jaǵadan 13-15 metr qashyqtyqta 1,8-2 metr tereńdikten shyǵaryldy.
