Aqtóbede bir otar qoı urlap, soıyp alǵan top ustaldy
AQTÓBE. QazAqparat – Aqtóbeniń Qobda aýdanynda 113 qoıdy aıdap áketip, onyń 23-in soıyp alǵan top ustaldy, dep habarlaıdy QazAqparat tilshisi.
Aýdandaǵy Sarybulaq aýyly turǵynynyń qorasynan 113 bas qoıdyń urlanǵany anyqtalyp, jedel tergeý toby izine tústi.
«Qoıdy aýdan ortalyǵyna aıdap ketkeni belgili boldy. Іzdestirý sharasy kezinde Qobda aýylynyń shetinde ornalasqan úılerdiń birinde 5 qasapshynyń júrgeni anyqtaldy. Olar qoıdy baýyzdap, 23-in soıyp úlgergen. Aldyn ala boljam boıynsha, kúdiktiler qoı ıesiniń úıinde joq ekenin paıdalanyp, 40 shaqyrym jerdegi aýdan ortalyǵyna ákelgen», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, Qylmystyq kodekstiń «Urlyq» baby boıynsha tergeý bastaldy. Kúdiktiler Qobda men Sarybulaq aýylynyń turǵyndary bolyp shyqty. Olar ýaqytsha ustaý ızolıatoryna qamaldy. Qazir kúdiktilerdiń osyǵan uqsas qylmystarǵa qatysy bar-joǵy tekserilip jatyr.
