Aqtóbede bir mezette birneshe úıdiń karantınge jabylý sebebi túsindirildi
AQTÓBE. QazAqparat - Aqtóbede kópqabatty 50 kireberis jáne 20 jeke úı 14 kúndik karantınge jabyldy, dep habarlaıdy QazAqparat tilshisi.
«Sáýirdiń 29-30 aralyǵynda, ıaǵnı, bir kúnde Aqtóbe qalasy aýmaǵynda 71 adam COVID-19 vırýsyn juqtyrdy. Epıdemıologııalyq ahýal kúrt shıelenisip, kóppáterli turǵyn úılerdiń 50 podezi jáne 20 jeke úı 14 kúnge karantınge jabyldy. 30 sáýir men 5 mamyr aralyǵynda osy úılerdiń karantınge jabylǵan podezinde turatyn adamdardan indet anyqtaldy. Olardyń buryn vırýs juqtyrǵan adamdarmen baılanysta bolǵany rastaldy», - dedi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
Bul úılerde taǵy 17 adam koronavırýs ınfektsııasyn juqtyrǵan.
«Karantındi toqtatqan jaǵdaıda turǵyndardyń qaterli dertti juqtyrý qaýpi joǵary bolmaq. Bul úılerde ártúrli sozylmaly syrqaty bar egde adamdar, júkti áıelderdiń, sondaı-aq balalardyń turyp jatqanyn eskerip, ýaqytsha engizilgen shekteýge túsinikpen qarap, tártipti qatań saqtaýdy suraımyz. Karantın tártibin belgilengen merzimde alyp tastaý adamdardyń jaýapkershiligine baılanysty», - dep habarlady baspasóz qyzmeti.
