Aqtóbede bir mektepke ekinshi ret «bomba qoıǵan» adam izdestirilýde

AQTÓBE. QazAqparat – Aqtóbe qalasyndaǵy №51 mektep-gımnazııasynyń elektrondy poshtasyna ǵımaratqa bomba qoıylǵany týraly hat taǵy da tústi, dep habarlaıdy QazAqparat tilshisi.

Búgin saǵat 10:15-te №51 mektep-gımnazııasynyń elektrondy poshtasyna «mektepke bomba qoıyldy» degen habarlama tústi. Barlyq shuǵyl qyzmet dereý oqıǵa ornyna jetip, oqýshylardy, muǵalimder men kishi qyzmetkerlerdi evakýatsııalady.

«Barlyǵy 550-den astam adam evakýatsııalandy. Arnaıy bólimshe saperleri jarylǵysh qurylǵyny anyqtaý úshin tekserý júrgizdi. Jarylǵysh zat tabylǵan joq. Qazir sotqa deıingi tergeý bastaldy. Polıtsııa departamenti kúdiktini anyqtaý jáne ustaý úshin jedel is-sharany qolǵa aldy», - dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.

Eske salsaq, 18 qańtar kúni osy mekteptiń elektrondy poshtasyna dál osy mátinde habarlama túsken bolatyn. Hatty joldaǵan adam áli anyqtalmady.