Aqtóbede bir mektepke eki márte «bomba qoıǵan» adam tabylmaı jatyr
AQTÓBE. QazAqparat – Aqtóbede №51 mektep-gımnazııasyna «jazylǵysh zat qoıyldy» dep eki ret habarlama taratqan adam áli izdestirilip jatyr, dep habarlaıdy QazAqparat tilshisi.
Qańtar aıynda Aqtóbe qalasyndaǵy №51 mektep-gımnazııasyna «bomba qoıylǵany» týraly 2 habarlama kelip tústi.
Eki hat ta elektrondy mekenjaıǵa joldanǵan. Habarlama jazǵan adamdy anyqtaýǵa jáne ustaýǵa baǵyttalǵan jedel is-shara júrgizilip jatyr.
«Terrorızm aktisi týraly kórineý jalǵan habarlama taratqany úshin Qazaqstan Respýblıkasy Qylmystyq kodeksiniń 273-babynda qylmystyq jaýapkershilik belgilengen. QR QK 273-baby boıynsha 14 jasqa tolǵan jasóspirim de jaýapqa tartylady», - deıdi Aqtóbe oblysy PD bastyǵy Atyǵaı Arystanov.
Aıta keteıik, osy baptyń sanktsııasy bes myń aılyq eseptik kórsetkishke deıingi mólsherde aıyppul salý ne sol mólsherde túzeý jumystary ne bes jylǵa deıingi merzimge bas bostandyǵyn shekteý ne sol merzimge bas bostandyǵynan aıyrý túrindegi qylmystyq jaýaptylyqty kózdeıdi.
«Bilim mekemeleriniń oqýshylary da qońyraý shalǵan fakti kezdesedi. Oqýshynyń jasyna qaramastan (onyń jeke múlki men tabysynyń bolmaýyna baılanysty) kelip túsken habarlamany tekserý jónindegi arnaıy is-sharalardy uıymdastyrýǵa jáne ótkizýge baılanysty materıaldyq zalal onyń ata-anasyna júkteledi. Byltyr terrorızm aktisi týraly osyndaı 2 jalǵan habarlama tústi. Qońyraý shalǵandar anyqtalyp, qylmystyq jaýapqa tartyldy», - deıdi Atyǵaı Arystanov.
Eske sala keteıik, 18 qańtarda atalǵan mektepke bomba qoıyldy degen habarlamadan soń 600-den astam adam evakýatsııalanǵan bolatyn.
26 qańtar kúni osy oqıǵa taǵy da qaıtalanyp, 550 adam qaýipsiz jerge shyǵaryldy.
