Aqtóbede bir aılyq sábıdiń jaǵdaıyna qatysty oqıǵa tekserilýde
AQTÓBE. QazAqparat - Aqtóbelik ata-ana dárigerlerdiń salǵyrttyǵyna narazy, dep habarlaıdy QazAqparat tilshisi.
Aqtóbe oblysy, Áıteke bı aýdanynyń turǵyndary tilshilerden kómek surap, náresteniń jaǵdaıyn aıtyp berdi. Sábıdiń ákesi Dáýren Ismaılovtyń aıtýynsha, 15 naýryz kúni balanyń dene qyzýy kóterilip, jedel járdem shaqyrdy. Áıteke bı aýdandyq aýrýhanasynyń feldsheri balanyń dene qyzýyn túsirý úshin ekpe jasady. Al 16 naýryz kúni sábıdiń kindikten tómen bóliginde isik paıda boldy.
«Balanyń quıryǵy, kindikten tómen biligi qaraıyp, isine bastady. Bala mazasyzdanyp, jylaı bergen soń jedel járdem shaqyrýǵa týra keldi. Alaıda dárigerler jol-kólik oqıǵasy bolyp, olar sol shaqyrýǵa ketkenin aıtty. Biz ózimiz aýrýhanaǵa baryp, hırýrgterge kórsettik. Olar birden «jórgekten allergııa» dep aıtyp, «Bepanten» maıyn jaǵýymyzdy tapsyrdy. 17 naýryz kúni de jaǵdaı esh ózgermeı, aýrýhana bas dárigeriniń orynbasary «Deazolın» berýdi usyndy. 18 naýryz kúni aýrýhanaǵa qaıta baryp, aıqaý-shýmen oblystyq aýrýhanaǵa joldama berildi. Oblys ortalyǵynda birden «náresteniń nekrotıkalyq flegmonasy» dıagnozyn qoıyp, 2 ret ota jasady. Dúısenbi kúni úshinshi ota bolady. Biz der kezinde dıagnoz qoıa almaǵan aq halattylardy jumystan shyǵarýdy talap etemiz», - dedi balanyń ákesi Dáýren Ismaılov.
Aqtóbe oblystyq densaýlyq saqtaý basqarmasy basshysynyń orynbasary Svetlana Esenamanova aýrýhanada em alyp jatqan náresteniń jaǵdaıy qalypty ekenin aıtyp berdi.
«Náresteniń nekrotıkalyq flegmonasy» dıagnozy qoıyldy. Sebebi, sábıdiń terisi tym názik ári tez zaqymdanady. Teri aýrýynyń arty flegmonaǵa, ıaǵnı, irińdi jaraǵa ulasýy múmkin. Balanyń dene qyzýy kóterilip, embeı qalady. Mazasyzdanyp, deneniń belgili bir bóligi qyzaryp, isinedi. Dál osy kezde aýdanda jedel járdem shaqyrylǵan. Dene qyzýyn túsirýge keńes berip, alǵashynda jórgekke allergııa dep qabyldady. Nekrotıkalyq flegmona anyqtalǵan soń birden oblystyq balalar aýrýhanasyna jiberildi. 18 naýryzdan beri náreste em alyp jatyr. Náreste neontaldy hırýrgııa bóliminde em qabyldaýyn jalǵastyrady, jaǵdaıy turaqty. Jambasynda, kindikten tómen bólikte, shatynda flegmona bar. Ata-ananyń shaǵymynan soń aýdandaǵy, oblys ortalyǵyndaǵy alǵashqy medıtsınalyq kómektiń qalaı kórsetilgeni anyqtalady», - dedi Aqtóbe oblystyq densaýlyq saqtaý basqarmasy basshysynyń orynbasary Svetlana Esenamanova.
