Aqtóbede bir aptada 11 toı ıesine aıyppul salyndy
AQTÓBE. QazAqparat – Aqtóbe oblysynda bir aptada 11 toı ıesine 7 mıllıon teńdegen astam aıyppul salyndy, dep habarlaıdy QazAqparat tilshisi.
Ótken táýlikte óńirde 10 adamnan koronavırýs ınfektsııasy anyqtaldy. Onyń altaýy qala turǵyny.
Oblystyń bas memlekettik sanıtarııalyq dárigeri Nursulý Berkimbaevanyń habarlaýynsha, tórteýi zeınetker. Bos ýaqyty kóp, alańsyz júrgen olar kóbine qonaqqa baryp, dúken aralap dertke shaldyqqan. Al tórteýi Mártók aýdanynan. Onyń ishinde ekeýi Reseıden kelgen Jambyl oblysynyń turǵyny.
Aýrýdyń taraý deńgeıi bir kúnde 0,3% qurady. Jalpy oblysta 3395 jaǵdaı tirkeldi. Adamdardyń 97 % jýyǵy jazylyp shyqty. Úı karantıninde 263 aqtóbelik jatyr.
«3-9 qarasha kúnderi aralyǵynda meıramhanalarda 11 toı ótkizilgen. Olarǵa 7,2 mıllıon teńgege aıyppul salyndy. Qazir oblysta epıdahýal turaqty. Eger biz betperde taǵyp, araqashyqtyqty saqtasaq, jaǵdaı qalypty bolady. Sondaı-aq óńirde oqýshylardan COVID-19 anyqtalmady. Oqýshy sany 300-den aspaıtyn mektepter dástúrli oqý tártibine kóshedi. Qazir Qaýly daıyndalyp jatyr», - dedi Aqtóbe oblysynyń bas memlekettik sanıtarııalyq dárigeri Nursulý Berkimbaeva.
Aıta keteıik, óńirde 2 balabaqsha balasynan koronavırýs ınfektsııasy anyqtalyp, ekeýi de karantınge jabylǵan. Al top balalary men tárbıeshiden PTR test alynǵan.
