Aqtóbede bir adam oq jaraqatynan kóz jumdy
AQTÓBE. QazAqparat – Aqtóbeniń Hromtaý aýdanynda oq jaraqatynan bir adam kóz jumyp, bireýi aýrýhanaǵa jatqyzyldy, dep habarlaıdy QazAqparat tilshisi.
«17 naýryz kúni saǵat 03:10-da Hromtaý aýdandyq ortalyq aýrýhanasyna eki turǵyn oq jaraqatymen jetkizildi. Bireýi - 40 jastaǵy er adam. Ol oq jaraqatynan aýdandyq aýrýhanada kóz jumdy. Al ekinshisi hırýrgııa bólimine jetkizildi. Aldyn ala tergeý barysynda anyqtalǵandaı, Hromtaý qalasy Álipov kóshesinde belgisiz bireý qarý qoldanyp, jábirlenýshilerdi óltirý maqsatynda oq atqan. Jedel izdestirý barysynda polıtsııa qyzmetkerleri Hromtaý qalasynyń 24 jastaǵy turǵynyn anyqtap, ustady», - dep habarlady oblystyq polıtsııa departamenti baspasóz qyzmetiniń jetekshisi Erbolat Sarqulov.
Aıta keteıik, osy derek boıynsha Qylmystyq kodekstiń «Adam óltirý» babymen sotqa deıingi tergeý bastaldy. Kúdikti ýaqytsha ustaý abaqtysyna qamaýǵa alyndy.
