Aqtóbede bilim basqarmasynyń burynǵy basshysy qyzmetine qaıta oralmaq boldy
Oblystyq bilim basqarmasynyń burynǵy basshysy Lázzat Orazbaeva oblys ákimi apparatyn kinálap, eńbek shartyn buzý jónindegi ókimdi zańsyz dep taný, kúshin joıý, jumysqa qaıta ornalastyrý, jalaqy men moraldyq zııandy óndirip alý týraly aryz túsirdi.
Azamattyq is sotta qaraldy. Talap qoıýshy jumystan bosatý týraly ótinish jazý kezinde oǵan basshylyq tarapynan qysym kórsetilgendigi, sonymen qatar Bilim jáne ǵylym mınıstriniń kelisimi bolmaǵany týraly jazdy. Іs materıalyna súıensek, 2021 jyly 17 qańtarda Lázzat Orazbaeva densaýlyq jaǵdaıyna baılanysty jumystan bosatý týraly ótinish jazý kezinde qysym kórsetilgenin dáleldeı almady. Kýáger, Aqtóbe oblysy ákimi apparaty basshysynyń orynbasary da bul faktini rastamady. Zańnyń talaptaryna sáıkes, ótinishti bergen kúnnen bastap bir aı ishinde ony keri qaıtaryp alýǵa quqyly. Talapkerdiń ótinish berý ýaqyty 2021 jyldyń 16 aqpany kúni saǵat 18:00-de aıaqtalady. Al ótinish ákim apparatynyń elektrondy poshtasyna 16 aqpan kúni saǵat 21:45-te tústi.
«Talap qoıýshy ýaqytyn ótkizip alǵan. Al Bilim jáne ǵylym mınıstriniń L.Orazbaevany óz erkimen qyzmetinen ketý týraly kelisiminiń joqtyǵy týraly dálelderin sot dármensiz dep tapty. Osylaısha sot eńbek zańnamasy men talap qoıýshynyń zańdy quqyqtary men múddeleriniń buzylýy anyqtalǵan joq dep tanydy. Sot sheshimimen talap qoıýshynyń aryzy qanaǵattandyrylmady. Sheshim zańdy kúshine engen joq», - dep habarlady Aqtóbe qalalyq sottyń baspasóz qyzmeti.