Aqtóbede bıletsiz jolaýshylar úshin jolserikter jazalandy
AQTÓBE. QazAqparat - Aqtóbede bes kún ishinde poıyzǵa bıletsiz mingen 49 adam anyqtaldy. Vagondardyń jolserikterine ákimshilik aıyppul salyndy, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń «Aqtóbe - adaldyq alańy» jobalyq keńsesi «Jolaýshylar tasymaly» AQ-nyń oblystyq fılıalymen, kóliktik baqylaý ınspektsııasymen birge bıletsiz jolaýshylardy anyqtaý maqsatynda reıd ótkizdi. Anyqtalǵan 55 jolaýshynyń 49-y sońǵy bes kúnde tirkeldi.
«Almaty-2 - Saratov» baǵytyndaǵy poıyzda bıletsiz mingen 6 jolaýshy anyqtaldy. «Jolaýshylar tasymaly» AQ-da jumys isteıtin 3 jolserik ákimshilik jaýapkershilikke tartylyp, árqaısysyna 2,5 AEK kóleminde aıyppul salyndy. Sonymen qatar esh qujatsyz qosymsha 170 keli júk tasymaldanǵan. Al «Atyraý - Almaty» baǵytyndaǵy 8 jolserik pen poıyz brıgadıri 12 jolaýshyny bıletsiz mingizgeni úshin jazalandy. «Almaty - Atyraý» baǵytynda da 37 bıletsiz jolaýshy boldy», - dedi «Aqtóbe- adaldyq alańy» jobalyq keńsesi sarapshylar keńesiniń basshysy Janbolat Tortaev.
Buǵan deıin Aqtóbe temirjol vokzalyndaǵy avtoturaq pen kassaǵa shaǵym kóptep túsip jatqanyn jazǵan bolatynbyz.
