Aqtóbede bıletsiz poıyzǵa mingen sheteldikter anyqtaldy
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń «Aqtóbe - adaldyq alańy» jobalyq keńsesi Aqtóbege qatynaıtyn poıyzǵa bıletsiz mingenderdi anyqtady.
Reıd «Jolaýshylar tasymaly» AQ-y fılıalynyń ókilderimen birge iske asyryldy. «Jasyryn satyp alýshy» ádisimen saparshylar keńesiniń múshesi Meırambek Kamalov Aqtóbeniń Shubarqudyq stansasynan Qandyaǵash stansasyna 1 myń teńgege kelisip, poıyzǵa mindi.
«Jolserikterdiń ózin-ózi ustaý máselesi de qadaǵalanýy tıis dep esepteımiz. Sebebi zańsyzdyq anyqtalǵan kezde 8-vagon jolserigi dóreki sózder aıtyp, ashýyn tejeı almady. Jolaýshylarǵa qyzmet kórsetetin jolseriktiń áreketi osy baǵyttaǵy jumystardyń aqsap turǵanyn kórsetedi», - dedi sarapshy Meırambek Kamalov.
№41 «Atyraý - Almaty» baǵytyndaǵy jolaýshylar poıyzynda barlyq vagon tekserilip, 12 jolaýshynyń bıletsiz mingeni anyqtaldy. Olardyń kóbi Atyraý stansasynan mingen. Arasynda Tájikstan, Qyrǵyzstan azamattary da bar.
«Turmystyq jemqorlyqtyń aldyn alý, azamattarǵa jaıly jaǵdaı jasaý úshin reıd júrgizildi. Reıd kezinde bıletsiz mingen 12 adam anyqtaldy. Keıbiri dittegen jerine jetý úshin jolserikke 15 myń teńge bergen eken. Bári de tirkeýge alynyp, shara qoldaný úshin qujattar «Jolaýshylar tasymaly» AQ-nyń fılıal basshylyǵyna berildi», - dedi «Adaldyq alańy» sarapshylar keńesiniń basshysy Janbolat Tortaev.
Bul jumys aldaǵy ýaqytta jalǵasady. «Adaldyq alańy» jobalyq keńsesi qaı baǵytqa qatynaıtyn jolaýshylar poıyzyn reıdtik tekserýge alatynyn qupııa saqtaıdy.
Sarapshylar keńesiniń basshysy Janbolat Tortaevtyń aıtýynsha, jolaýshylardy bıletsiz mingizgen jolserikter mindetti túrde jazalanady.
