Aqtóbede bıylǵy órt shyǵyny 151 mln teńgege jetti

AQTÓBE. KAZINFORM — Oblysta bıyl 359 órt tirkeldi. Órttiń kóbi turǵyn úı sektorynda bolǵan. 

Aqtóbe oblystyq TJD memlekettik órt baqylaý basqarmasynyń bastyǵy Nurhat Qaldybaevtiń aıtýynsha, órt kezinde barlyǵy 5 adam kóz jumyp, 9 adamdy kúıik shaldy. Tirkelgen 359 órttiń kóbi turǵyn úı sektorynda boldy. Sonymen birge kólik te jıi janǵan.

— Materıaldyq shyǵyn — 151 mln teńge. Órttiń 151-i turǵyn úı sektorynda boldy. Sonymen birge 136 kólikten órt shyqty. Qala men aýdan ákimdikterimen birge áleýmettik jaǵynan osal toptar sanatyna jatatyn 7389 turǵyn úı esepke alyndy. Búgingi tańda departament qyzmetkerleri men jergilikti atqarýshy organ mamandary birlesip 1150-den astam úıdi aralap, túsindirý jumysyn júrgizdi. Peshti daıyndaý kerek. Kómir jaǵatyn peshterdi úsh aıda bir ret tazartqan jón. Al gaz peshteriniń tehnıkalyq jaramdylyǵyn qazirden bastaǵan durys, — dedi Aqtóbe oblystyq TJD memlekettik órt baqylaý basqarmasynyń bastyǵy Nurhat Qaldybaev.

Qazir Aqtóbede órt qaýipsizdi týraly eskertý berilip jatyr. Reıd kezinde tótenshe jaǵdaılar qyzmetiniń mamandary arnaıy kıimmen júredi. Sonymen birge turǵyndar olardan qyzmettik kýálikti surap, kúmándansa 112-ge habarlasa alady.

— Áli de órt qaýipsizdiginiń joǵary deńgeıi bar. Qobda aýdanynyń Álııa aýylynda 10-ǵa jýyq úı aýlasyndaǵy shóp jandy. Shóp jınalǵan jer men úı arasy 15 metr bolýy tıis. Shóp jınalǵan jerge jaqyn mańda temeki shegýge bolmaıdy, ot jaqpaǵan jón. Aýyl sharýashylyǵy qurylymdary ıelerine shóp jınaıtyn aýmaqtaryna mıneraldy jolaq salý týraly aıtyldy, — dedi Nurhat Qaldybaev.

Aıta keteıik, Batys Qazaqstanda 465 órt oqıǵasynyń teń jartysynan astamy turǵyn úıde tirkelip otyr. Saldarynan 9 adam qaza taýyp, úsheýi túrli jaraqat aldy.