Aqtóbede bıylǵy oqý jylynda 6 oqýshy astan ýlanǵan

AQTÓBE. KAZINFORM — Aqtóbe qalasynda bıylǵy oqý jylynda bastaýysh synyptyń 6 oqýshysy astan ýlandy. Epıdemıologtar isti polıtsııaǵa tapsyrdy.

Aqtóbe oblysy boıynsha bıyl mektepte jappaı ýlaný deregi tirkelgen. Oblystyq sanıtarııalyq-epıdemıologııalyq baqylaý departamenti basshysynyń orynbasary Nurlybek Dosjanovtyń aıtýynsha, bastaýysh synyptyń 6 oqýshysy aýyrǵan soń mektep ashanasyna tekserý júrgizildi.

— Tekserý júrgizilip, barlyq materıal polıtsııaǵa joldandy. Jedel ishek aýrýyna shaldyqqan 6 jaǵdaı tirkelse, tórteýinde gastrıt, ekeýinde salmonellez bolyp shyqty. Balalar úıden, mektepten, kósheden tamaqtanǵan. Naqty neden aýyrǵany belgisiz áli. Іs qalalyq polıtsııa basqarmasy Astana aýdandyq № 1 polıtsııa bólimine berildi. Qylmystyq kodekstiń 304 baby 1 bóligi boıynsha sotqa deıingi tergep-tekserý júrip jatyr, — dedi Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Nurlybek Dosjanov.

Alaıda Aqtóbe oblystyq PD baspasóz qyzmeti bul istiń qaı satyda ekenin aıta almady. Al Aqtóbe oblystyq bilim basqarmasy qandaı da bir aqparat bermedi.

Aıta keteıik, byltyr Aqtóbede 10 adam qoǵamdyq tamaqtaný ornynda ýlanǵan. Onyń jeteýi bala. Ákimshilik quqyqbuzýshylyq týraly kodekstiń 463 baby 1 tarmaǵy negizinde 86 250 teńge aıyppul salyndy. Al 425 baby 2 tarmaǵy negizinde qyzmeti 1 aıǵa toqtatylyp, 1,5 mln teńge kóleminde aıyppul salyndy. Mundaı jaǵdaıdyń aldyn alý úshin epıdemıologtar kásipkerlerdi jıyp, sanıtarlyq talaptardy túsindirip turady.

Eske salsaq, Aqtóbe oblysynda bıyl 9 adamnan menıngokokk ınfektsııasy anyqtalyp, rastaldy. Epıdemıologtar 250 adamdy teksergenimen, kimniń vırýs taratyp júrgenin anyqtaı almaı otyr. 

Vıdeo: Altynaı Saǵyndyqova