Aqtóbede bıyl respýblıkalyq mańyzy bar qaı joldar jóndeledi
AQTÓBE. KAZINFORM – Qurylys jumystary Ortalyq-Batys, Aqtóbe-Ulǵaısyn jáne Beıneý-Sekseýil jobalaryn qamtıdy.
Aqtóbe oblysy aýmaǵyndaǵy joldyń 1875 shaqyrymy respýblıkalyq mańyzǵa ıe. Bıyl Ortalyq-Batys, Aqtóbe-Ulǵaısyn jáne Beıneý-Sekseýil jobalary boıynsha qurylys jumystary júrgiziledi.
– Aqtóbe-Qarabutaq-Ulǵaısyn jolynyń uzyndyǵy – 262 shaqyrym. Qaıta jańǵyrtý jobasy 7 ýchaskege bólindi. Qazirgi kezde 791-819 shaqyrym aralyǵynda bir ýchaskedegi qurylysty «SıneMıdasStroı» JShS-i júrgizip jatyr. Bıyl qurylysqa qajetti temirbeton buıymdarynyń 40 paıyzy, bıtýmnyń 20 paıyzy jáne qıyrshyqtastyń 26 paıyzy daıyndaldy. Al qalǵan 6 ýchaske, ıaǵnı, 234 shaqyrym jol qurylysyn júrgizý úshin konkýrs rásimi ótip jatyr. Qarjy Eýropa qaıta jańǵyrtý jáne damý banki, Azııa ınfraqurylymdy ınvestıtsııalaý bankinen bólinedi. Qurylysty bıyl bastaý josparlandy, - dedi «QazAvtoJol» AQ AOF dırektory Aıbol Danaǵul.
Sonymen birge Ortalyq-Batys kólik dáliziniń Astana-Yrǵyz aralyǵyndaǵy jol 21 lotqa bólindi. Dál sol jobadaǵy 3 lot Aqtóbe terrıtorııasyna tıesili. Bul degenimiz – 141 shaqyrym. Byltyr tehnıkalyq-ekonomıkalyq negizdemeniń oń qorytyndysy alyndy. Bıyl úshjaqta kelisimge qol qoıylyp, qurylys jumysyn CITIC Construction So., LTD júrgizetin boldy.
Úshinshi iri joba – Beıneý-Sekseýil baǵyty. Tehnıkalyq-ekonomıkalyq negizdemesi bıyl alyndy. Uzyndyǵy 559 shaqyrymdyq jobanyń 245 shaqyrymy Aqtóbe oblysynyń aýmaǵy arqyly ótedi.
– Joba aıasynda Beıneý-Bozoı-Sekseýil, Bozoı-Begimbet aralyǵynda jol qurylysy, Begimbet-Shalqar aralyǵynda jóndeý jumysy qarastyrylǵan. Bazoı aýylynda jol paıdalaný bazasy salynady. Jol qurylysy kezinde paıdalanylatyn jer Shalqar jáne Baıǵanın aýdandaryna tıesili. Eki aýdanda da myń gektarǵa jýyq jerdi qoldaný ruqsaty alyndy. Bul jer respýblıkalyq balansqa ótedi. Qarjylandyrý kózi naqtylanyp jatyr, - dedi Aıbol Danaǵulov.
Sonymen birge sý tasqyny kezinde jaramyz bolyp qalǵan Jem kópirine kúrdeli jóndeý júrgiziledi. Qazir munda uzyndyǵy 36 metr bolatyn ýaqytsha kópir salynyp jatyr. Jumys 10-naýryzda aıaqtalady. Al kópirdiń ózi jazda qoldanysqa beriledi. Qaýyljyr kópirinde de dál osynaı jumys atqarylady.
Budan ózge bıyl Yrǵyz-Qyzylorda, Qarabutaq-Qostanaı, Qandyaǵash-Shalqar, Aqtóbe-Álimbet joly men Soltústik aınalma jolda ortasha jóndeý jumys josparlanǵan. Shamamen 25,4 mlrd teńge jumsalady. Qarjy Qazaqstan damý bankinen bólinip, merdigerdi anyqtaý úshin konkýrs ótip jatyr. Sonymen birge shamamen 200 shaqyrymdyq 4 joldy ortasha jóndeý, 4 kópirdi kúrdeli jóndeýge 28 mlrd teńge suralady.
Aıta keteıik, BQO-da jol jóndeýge bólingen qarjyny jymqyrý isi boıynsha tergeý aıaqtaldy. Kúdiktiler oryndalǵan jumystar aktilerine jalǵan málimetterdi júıeli túrde engizip otyrǵan.
