Aqtóbede bıyl eki myńnan astam iri qara maldan brýtsellez anyqtaldy
AQTÓBE. KAZINFORM — Mal dárigerleri 524 myńnan astam iri qaradan synama alǵan. Onyń 2048-i oń nátıje kórsetip, brýtsellez tirkeldi. Sonymen birge asa qaýipti aýrýlardyń 5 oshaǵy anyqtaldy.
Aqtóbede bıyl 8 aıdyń ishinde múıizdi iri qaramen qatar 352 usaq maldan brýtsellez aýrýy tabyldy. Brýtsellez anyqtalǵan maldyń bári veterınarııalyq-sanıtarııalyq talaptarǵa sáıkes zararsyzdandyryldy. Sonymen birge aýyl sharýashylyǵy janýarlarynyń asa qaýipti aýrýlarynyń 5 oshaǵy tirkelgen.
— Yrǵyz aýdany Qyzyljar aýyldyq okrýgine qarasty Qurylys jáne Sheńbertal eldi mekenderinde mal ólimi tirkeldi. Zerthanalyq tekserýden soń Qurylys aýylynda leptospıroz, Sheńbertal aýylynda teılerıoz aýrýy anyqtaldy. Bul eki aýrý da bizdiń oblysta buryn-sońdy kezdespegen. Leptospıroz kemirgish arqyly taraıdy. Veterınarııa ınspektsııasynyń usynysymen shekteý jarııalandy. Epızootııaǵa qarsy jasaq jumys istep, jaǵdaı turaqtaldy. Sheńbertal aýylynda anyqtalǵan teılerıoz da oblysta kezdespegen. Shekteý qoıylǵan soń onda da jaǵdaı turaqtaldy. Eki aýylda 53 mal basy joıyldy. Sonymen birge osy aýdandaǵy Jaısańbaı aýylynda 16 iri qaradan teılerıoz anyqtaldy, — dedi Aqtóbe oblystyq veterınarııa basqarmasynyń basshysy Aıbek Sembaı.
Aıta keteıik, Aqtóbe oblysy aýmaǵynda qazir 2 505 603 mal bar. Onyń ishinde 692 915 múıizdi iri qara, 1 337 100 usaq qoı-eshki, 445 381 jylqy, 26 720 túıe, qalǵany shoshqa. Bıyl asa qaýipti 12 aýrýǵa qarsy vaktsınatsııalaý jumystaryn júrgizý josparlandy. Respýblıkalyq qordan 8 080 080 doza vaktsına kelip tústi jáne aýdandarǵa taratyldy.
Eske salsaq, Yrǵyz aýdanynda mal qyrylǵanda QR Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń mamandary keldi. Aqtóbe oblystyq aýmaqtyq ınspektsııasynyń jáne oblystyq veterınarııa basqarmasynyń mamandary baryp, jergilikti turǵyndarmen kezdesý ótkizdi.
