Aqtóbede bıyl 94 myń gektar jer memleket menshigine qaıtaryldy
AQTÓBE. KAZINFORM – Qaıtarylǵan jer telimi qaıtadan aınalymǵa shyǵarylady. Sonymen birge jerdi alyp, paıdalanbaı otyrǵandardy anyqtaý jumysy jalǵasady.
Óńirde jerdi paıdalaný zańdylyqtarynyń saqtalýy únemi baqylaýda bolady.
Jer resýrstaryn basqarý departamentiniń basshysy Islam Іzbasqanovtyń aıtýynsha, bıyl jospardan tys 120 tekserý júrgizildi. Bul tekserý 149,2 myń gektar aýmaqty qamtydy. Nátıjesinde jalpy aýmaǵy 94 myń gektardy quraıtyn 62 jer ýchaskesi memleket menshigine qaıtaryldy. Endi jer telimderi qaıtadan aınalymyǵa enedi. Sonymen qatar 92 sýbekt ákimshilik jaýapqa tartylyp, salynǵan aıyppuldyń jalpy somasy 3,6 mln teńgeni qurady.
- Aýyl sharýashylyǵy maqsatyndaǵy jerlerdi paıdalanbaǵany úshin jer salyǵy mólsheri 40 eselenedi. Bul – jerdi tıimsiz paıdalanýshylarǵa yqpal etýdiń qosymsha tetigi. Departament ótken jyldary paıdalanylmaı jatqan 588 jer ýchaskesine jer salyǵynyń joǵary mólsherlemesin qoldandy. Qaıta esepteý nátıjesinde jer paıdalanýshylaryna qosymsha 91 mln teńge esepteldi, – dep túsindirdi Islam Іzbasqanov.
Aıta keteıik, Aqtóbe oblysy 25,3 mln gektar jaıylymdyq jeri bar elimizdegi eń iri óńir. 2025 jyly óńirde 554 myń tonna dándi daqyl jáne 72,4 myń tonna maıly daqyl jınaldy.
