Aqtóbede bıyl 756 myń gektar jerge egis salý josparlandy

AQTÓBE. KAZINFORM – Bıyl Aqtóbede egis alqabynyń aýmaǵy 756 myń gektar bolady. Kóbi dándi daqyl.

Aqtóbe oblysynda kóktemgi egis naýqanyna daıyndyq júrip jatyr. Barlyǵy 756 myń gektar jer jyrtylyp, ıgerý josparlansa, onyń 446 myń gektary dándi daqyl. Al 237 myń gektarǵa mal azyǵy egiledi. Sonymen birge 11 myń gektar jerge kartop pen túrli kókónis ósiriledi. 

- Egis jumystaryna 49 myń tonna tuqym qajet dep otyrmyz. Qazirgi kezde onyń 43 myń tonnasy bar. Qalǵany egis jumystary bastalǵanǵa deıin jetkiziledi. Jalpy tuqym aldyn ala zerthanalyq tekserýden ótýi tıis. Búginde tuqymnyń 96 % kondıtsıaly bolyp tur. Sonymen birge 7,2 myń tonna dızel otyny qajet bolady. Olardy jetkizýdi eki operator moınyna alyp otyr. Sharýashylyqtarǵa lıtrine 249 teńgege jetkiziledi,- dedi Aqtóbe oblystyq aýyl sharýashylyǵy jáne jer qatynastary basqarmasynyń bólim basshysy Nurbek Raıymbaev. 

Egis jumystary úshin «Keń dala» baǵdarlamasy aıasynda 2,3 mlrd teńge qarjy bólinedi. Sharýalar 5% ústemaqymen nesıe rásimdeı alady. Qazirgi kezde onyń teń jartysyna ótinim berilgen. Sonymen birge ósimdik sharýashylyǵyn sýbsıdııalaý úshin 1,1 mlrd teńge qarjy qarastyryldy.