Aqtóbede bıyl 35 myń oryndyq stadıon men zamanaýı teatr qurylysy bastalady
AQTÓBE. KAZINFORM – Aqtóbe qalasynda elimiz boıynsha eń úlken stadıon qurylysy bastalady. Sonymen birge teatr salynady.
Aqtóbe oblysynda bıyl iri qurylys jumystary bastalady. Memleket basshysy Qasym-Jomart Toqaevtyń tapsyrmasy boıynsha zamanaýı teatr salynady.
- T.Ahtanov atyndaǵy drama teatr eski ǵımaratta ornalasqan. Ǵımarat 1944 jyly salynǵan. Qazirgi kezde onda qazaq jáne orys trýppasy daıyndyq ótkizip, qoıylymdardy sahnalaıdy. Prezıdent kelgen ýaqytta mádenıet janashyrlary usynys aıtyp, qoldaý tapty. Oblys ákimine tapsyrma berdi. Qazirgi kezde jobalaý jumysy bastaldy. Ol úshin oblystyq bıýdjetten qarjy da bólindi. Bıyl mamyr aıynda jobalyq-smetalyq qujaty aıaqtalsa, memlekettik saraptamaǵa jiberiledi. Jospar boıynsha qurylys jumysy úshinshi toqsanda bastalyp, keler jyly aıaqtalady. Teatr Aqtóbe qalasynyń Altyn orda shaǵyn aýdanynda ornalasady. Jobalaý jumystaryna oblystyq bıýdjetten 200 mln teńgeden astam qarjy bólindi. Ol jerge ózge de áleýmettik nysandar salynady,- dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Onyń aıtýynsha, teatr 700 oryndyq bolady. Úlken jáne kishi zaly qarastyrylady. Sonymen birge jańa teatr mańynda saıabaq pen stadıon salynady.
- Aqtóbede 35 myń oryndyq stadıon salynady. ÝEFA standartyna saı bolady. Ári ázirge elimizdegi eń úlken stadıon bolady. Qazirgi kezde jobalaý jumysy júrip jatyr. Keıin naqty qarjy kólemi belgili bolady. Sonymen birge qalada 5 myń oryndyq sport kesheni salynady. Munda sporttyń barlyq túrimen aınalysýǵa bolady,- dedi Aslan Jarasbaev.
Eske salsaq, byltyr Prezıdent sapary kezinde jańa teatr salýdy tapsyrdy.