Aqtóbede bıyl 200-den astam adam qyzylsha juqtyrdy

AQTÓBE. KAZINFROM — Qazir 5 naýqas aýrýhanada em alyp jatyr, onyń tórteýi bala. Epıdemıologter aldaǵy demalys jáne mereke kúnderi balalardy jabyq oıyn-saýyq oryndaryna aparmaýǵa keńes beredi.

Aqtóbe oblysynyń epıdemıologteri demalys jáne Naýryz meıramy kúnderi asa saq bolýǵa shaqyrdy. Ásirese balalardy jabyq demalys oryndaryna aparý áli de bolsa qaýipti.

— Bıyl Aqtóbe oblysynda 224 adam qyzylsha juqtyrdy. Onyń 187-i Aqtóbe qalasynda bolsa, qalǵandary aýdandarda. Qazir bes naýqas aýrýhanada jatyr. Onyń ishinde tórteýi bala. Qorǵaný joly — ekpe. Sondyqtan qyzylsha aýrýynyń epıdemıologııalyq jaǵdaıyn turaqtandyrý úshin 6 aı, 10 aı 29 kún bolǵan balalarǵa da vaktsına berilip jatyr. Buryn qyzylshaǵa qarsy vaktsına almaǵan 2-5 aralyǵyndaǵy balalar men 7-18 jasqa deıingi kámeletke tolmaǵandar jappaı ımmýndaýǵa jatady. Balalardy qorǵaý úshin merekelik demalysta da saqtyq sharasyn umytpaý kerek. Vaktsına almaǵan balalardy oıyn-saýyq, saýda ortalyqtary men jabyq oıyn alańdaryna aparmaǵan durys, — dedi Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Indıra Aıaǵanov.

Aıta keteıik, qyzylsha — sóılesý, jótelý jáne túshkirý kezinde aýa-tamshy jolymen juǵatyn jedel vırýstyq ınfektsııa. Bul — balalar arasynda eń juqpaly aýrýdyń biri. Keıingi jyldary álemniń birqatar elinde vaktsınatsııa deńgeıiniń tómendeýine baılanysty qyzylsha aýrýynyń órshýi baıqalyp otyr.