Aqtóbede bıyl 164 myń gektar jer telimi qaıta aınalymǵa shyǵarylady
AQTÓBE. KAZINFORM — Jospar maýsym aıyna deıin oryndalýy tıis. Sonymen birge aýyl sharýashylyǵy maqsatyndaǵy 80 myń gektar jer ýchaskesi qaıtarylady.
Aqtóbe óńirinde jer ıeleriniń menshigindegi múlikti qalaı paıdalanyp jatqany, kelisimshart merzimi tekserilip jatyr. Búginge deıin jerdi maqsatyna saı paıdalana almaǵan adamdar 234,2 myń gektardy qaıtardy. Jer memlekettiń bosalqy jer qoryna ótti. Sonymen birge aýyl sharýashylyǵyn damytýǵa dep alǵan jerdi durys qoldanbaǵandar anyqtaldy. Barlyǵy 488,3 myń ga jer ýchaskesinde zań buzý tirkeldi.
— Byltyr kólemi 347,1 myń gektar bolatyn 216 jer ýchaskesi konkýrs arqyly tabystaldy. Al jer qoınaýyn paıdalanýshylarǵa kólemi 27 myń ga bolatyn 44 jer ýchaskesi berildi, — dedi Aqtóbe oblystyq jer qatynastary basqarmasynyń bólim basshysy Ádilbek Kabıdýllın.
Oblys boıynsha 2022–2025 jyldar aralyǵynda aýyl sharýashylyǵy maqsatyndaǵy 1,2 mln gektar jer memleket menshigine qaıtarylyp, basym bóligi aınalymǵa engizildi. Bıyl meje — 164,2 myń gektar.
— Paıdalanylmaı jatqan jerdi memleket menshigine qaıtarý nátıjesinde jaıylym tapshylyǵy bar keıbir aýdandardyń máselesi sheshilip jatyr. 2024 jyly kólemi 97 myń gektar bolatyn jaıylym qajet boldy. Ásirese Alǵa, Mártók aýdandary men Aqtóbe qalasynda tapshylyq tirkeldi. Qazirgi kezde qala aýmaǵynda jaıylym jer jetkilikti. Alǵa aýdanynda 16,4 ga jer bólindi. Biraq jaıylym tapshylyǵy máselesi eki aýdanda ári tolyqtaı sheshimin tapqan joq, — dedi Aqtóbe oblystyq jer qatynastary basqarmasynyń bólim basshysy Ádilbek Kabıdýllın.
Onyń aıtýynsha, oblysta 76,4 myń ga jaıylym jeri jetpeıdi. Alǵa Mártók aýdanynda áli de jaıylym tapshy.
Buǵan deıin habarlaǵanymyzdaı, Abaı oblysynda memlekettik jer telimin zańsyz paıdalanǵandar anyqtaldy.