Aqtóbede bıyl 12 myńnan astam túlekti jumyspen qamtý joly qarastyrylyp jatyr

AQTÓBE. KAZINFORM – Aqtóbede bıyl 12 myńnan astam jas qolyna dıplom alady. Olardyń keıbiri ózi týyp-ósken óńirge ketse, basym bóligi oblysta jumyspen qamtylýy tıis.

Aqtóbe oblysy boıynsha medıtsına jáne áskerı ushqyshtar salasynda ǵana túlekter qolyna dıplom almaı jatyp jumys ornyn anyqtaıdy. Al ózgeler úshin tórt túrli jol usynylady. 

- Bıyl oblys boıynsha 16 myńnan astam adam jumyspen qamtyldy. Onyń 6 myńǵa jýyǵy jastar. Qazirgi kezde jastardy jumyspen qamtý ózekti bolyp tur. «Eńbek naryǵyn damytý» tujyrymdamasy aıasynda «Jastar praktıkasy», «Alǵashqy jumys orny» jáne «Urpaqtar kelisimsharty» jobasy bar. «Jastar praktıkasyna» oqý ornyn aıaqtaǵan jas bara alady. Ol óz mamandyǵyn osy arqyly tereń meńgerip, jan-jaqty úırenip alady. Bir jyl ishinde aı saıyn 110 760 teńge alady. Al «Alǵashqy jumys» orny 18 aıǵa sozylady. Ol kezde jumys berýshi sol mamandy jumysqa alýǵa mindetti bolady. «Urpaqtar kelisimsharty» aıasynda zeınetke shyǵýǵa daıyndalyp júrgen adamdardyń ornyn aýystyrý kózdelgen, - dedi «Aqtóbe oblysy boıynsha eńbek mobıldigi ortalyǵy» KMM basshysy Altynaı Mahanova. 

Aıta keteıik, jas túlekter dıplom alǵan soń Mansap ortalyǵyna barýy kerek. Qaziri Aqtóbe oblysy boıynsha «Jastar praktıkasy» jobasyna 273 túlek baǵyttaldy. Bıylǵy jospar boıynsha 820 adam qamtylýy tıis. 

- Aqtóbe oblysy boıynsha Eńbek portalynda 1388 bos jumys orny bar. Kóbine bilim salasynda suranys bar. Mektep, balabaqshalarmen qatar qurylys, ІT salasyn atap ótýge bolady.

Qazaqstan boıynsha jumyssyz jastar deńgeıi 3,5% bolsa, Aqtóbede 2,7% qurap otyr. Byltyr 5 myńnan astam túlek esepke alyndy. Bıyl oblys boıynsha 12 myńnan astam túlek bar. Onyń ishinde ózge oblystyń da jastary tirkelgen, - dedi Altynaı Mahanova.