Aqtóbede betperde kıgen bireýler oqýshy qyzdy uryp ketti
AQTÓBE. QazAqparat - Aqtóbede №55 orta mektep oqýshysyn betperde kıgen qyzdar uryp ketken. Qazir ol em alyp jatyr, dep habarlaıdy QazAqparat tilshisi.
Aqtóbede mektep oqýshylary arasyndaǵy qylmys pen buzaqylyq azaıar emes. Sonyń biri jaqynda taǵy oryn aldy. №55 orta mektep dırektory Álııa Qasymovanyń aıtýynsha, soqqyǵa jyǵylǵan oqýshy densaýlyǵyna baılanysty sabaqqa kelmegen.
«14 jeltoqsan kúni anasy «balamdy aýrýhanaǵa aparamyn, qyzdar urǵan» dep aıtty. Keıin biz oqýshynyń jaǵdaıyn surap, telefonmen habarlasyp otyrdyq. Sol kezde tolyq tekserýden ótip jatqanyn aıtqan bolatyn. Aryz, shaǵym túspegen soń, onyń ústine oqıǵa mektep ishinde, aýlasynda bolmaǵan soń ózge aqparat bere almaımyz», - dedi ol.
Aqtóbe oblystyq polıtsııa departamentiniń baspasóz qyzmeti osy oqıǵa boıynsha Qylmystyq kodekstiń «Buzaqylyq» baby boıynsha is qozǵalyp, saraptama taǵaıyndalǵanyn aıtyp otyr.
«Synyp jetekshisi oqýshynyń ata-anasymen sóılesip, onyń keshe aýrýhanadan shyqqanyn bilip otyr. Sabaqqa da qosylady. Oqý úlgerimi ortasha, óziniń dostary bar. Voleıbolmen shuǵyldanady. Mektepte josparly túrde tárbıe sabaqtary ótedi. Mektep ınspektorlary men psıhologtar da kezdesý ótkizedi», - dep málim etti oblystyq PD baspasóz qyzmeti.
Eske salsaq, jeltoqsanda daryndy balalar mektep-ınternatynyń oqýshylary tóbelesip, biri ekinshisine pyshaq jaraqatyn salǵan bolatyn. Keıin mektep dırektory qyzmetinen ketip, birneshe muǵalim jazalandy. Al qazan aıynda №73 orta mektepte oqýshylar janjaldasyp, biri ekinshisine pyshaq suǵyp aldy. Keıin mundaı jaǵdaı №14 orta mektebinde tirkelip, ata-analary qylmystyq jaýapkershilikke tartyldy.
