Aqtóbede betperde kıgen belgisiz bireý úıge shabýyl jasap, bir adamdy atyp ketken
ASTANA. KAZINFORM – Aqtóbe qalasynda atys qarýynan jaraqat alǵan 49 jastaǵy er adamnyń máıiti tabyldy. Aldyn ala málimet boıynsha, betperde kıgen belgisiz adam jeke turǵyn úıge shabýyl jasap, aqsha, baǵaly zattar men avtokólikti alyp ketken.
Oqıǵa 16 qarashada bolǵan.
Qaza tapqan azamat 1977 jyly týǵan.
Aldyn ala derekterge sáıkes, belgisiz adam betperde kıip, jeke turǵyn úıge shabýyl jasaǵan. Ol aqsha men baǵaly zattardy, sondaı-aq avtokólikti ıemdenip, oqıǵa ornynan boı tasalaǵan.
Atalǵan derek boıynsha Qazaqstan Respýblıkasy Qylmystyq kodeksiniń 99-baby 2-bóligimen qylmystyq is tirkeldi.
– Atys qarýynan jaraqat alǵan er adamnyń máıitiniń tabylý faktisi boıynsha qylmystyq is qozǵaldy. Qazirgi ýaqytta kúdiktini anyqtaý jáne ustaýǵa baǵyttalǵan qajetti tergeý jáne jedel-izdestirý is-sharalary júrgizilýde. Tergeý múddesine baılanysty ózge aqparat jarııa etýge jatpaıdy. Jalǵan ári shyndyqqa sáıkes kelmeıtin aqparatty taratpaýlaryńyzdy jáne tek resmı aqparat kózderine senýlerińizdi suraımyz, – delingen polıtsııa habarlamasynda.
Qazirgi ýaqytta quqyq qorǵaý organdary kúdiktiniń jeke basyn anyqtap, ony ustaý baǵytynda jumys júrgizip jatyr.
Aıta keteıik, buǵan deıin Aqtóbede 26 jastaǵy áıeldiń neke saraıynda pyshaq jaraqatynan qaza tapqany habarlanǵan bolatyn. Qylmysqa kúdikti retinde onyń burynǵy kúıeýi ustaldy.