Aqtóbede bes saǵat boıy kepilde bolǵan kelinshek úreıin áli jeńe almaı júr
AQTÓBE. QazAqparat - 24 jastaǵy Abylaı Tileýovtiń qolynda 5 saǵat boıy kepilde bolǵan Ásem esin áli jııa almaı júr. Ol qazir úıinen bir qadam attap shyǵýǵa qorqady, dep habarlaıdy QazAqparat tilshisi.
Aqtóbe qalasynyń «Batys-2» yqsham aýdanynda ornalasqan «Jemchýg+» stomatologııalyq klınıkasy áli jabyq tur. Munda jumys ýaqytsha toqtatylǵan. Al 5 saǵat boıy Abylaı Tileýovtiń qolynda kepilde bolǵan Ásem atty kelinshek úıinen shyǵýǵa, jumysqa barýǵa qorqady. Ol eshkimmen sóılespeıdi, tildespeıdi.
«Ózderińiz oılańyzdar, men osy jaǵdaıdan keıin qalaı jumysqa baramyn?» - degen Ásem qandaı da bir aqparat berýden bas tartty.
Aıta keteıik, Abylaı Tileýovtiń áıeli stomatologııalyq klınıkaǵa jumysqa áli ornalasa qoımaǵan eken. Ol bul jerde tájirıbe jınap júrgen.
Eske salsaq, 14 naýryz kúni Abylaı Tileýov keshki saǵat 19:00-de stomatologııalyq klınıkaǵa baryp, Ásemdi kepilge alǵan. Bul beıneaıǵaq búgin ǵalamtorǵa tarap ketti . Arnaıy operatsııa kezindegi bul beıneni kimniń taratqany ázirge belgisiz. Oblystyq ishki ister departamenti osy derekke baılanysty qyzmettik tekserý jumystaryn bastady.
Abylaı Tileýov 7 naýryz kúni áıelinen ajyrasqan. Onyń eki balasy bar. Aqtóbe oblystyq ishki ister departamenti osy oqıǵaǵa baılanysty Qylmystyq kodekstiń «Densaýlyqqa qasaqana aýyr zııan keltirý», «Qarý qoldanyp adamdy kepilge alý» baptary boıynsha qylmystyq is qozǵady.
