Aqtóbede belgisiz bireý eki zeınetkerdi sabap ketti
AQTÓBE. QazAqparat - Aqtóbede belgisiz bireý eki zeınetkerdi sabap, 2 myń teńge aqshasyn alyp ketti, dep habarlaıdy QazAqparat tilshisi.
Aqtóbede 72 jastaǵy Zylıha Qospaeva bet-aýzy kógerip úıinde otyrsa, al 65 jastaǵy sińlisi Aıman Saǵyndyqova dene jaraqatymen aýrýhanaǵa tústi. Ekeýin de belgisiz bireýler soqqyǵa jyǵyp, aqshalaryn alyp ketken.
«Sińlim ekeýmiz birge turamyz. Oqıǵa 22 aqpan kúni saǵat 20:00-de boldy. Men úıde ydys-aıaq jýyp otyrdym, al sińlim esiktiń kilttengenin qaraýǵa ketti. Sol kezde eńgezerdeı er adam kelip, ura bastady. Sińlim dálizde qansyrap jatyr eken. Betin pyshaqpen tilip ketken, qazir aýrýhanada em qabyldap jatyr. Al meniń tisimdi syndyrdy», - dedi Zylıha Qospaeva.
Qarııanyń aıtýynsha, ol uryp-soqqan adamǵa aldymen 1 myń teńge, ony azsynǵan soń taǵy 1 myń teńge qosyp bergen.
«Bizden mıllıon surady. Al bizde bar bolǵany 2 myń teńge boldy. Sol aralyqta qashyp shyǵyp, kómek suradym. Kórshilerimiz jedel járdem shaqyrdy. Polıtsııa da keldi», - dedi Z.Qospaeva.
Qazir osy oqıǵaǵa baılanysty qylmystyq is qozǵaldy. Kúdikti izdestirilip jatyr.
«Belgisiz azamat úıge zańsyz kirip, eki azamatshaǵa dene jaraqatyn salǵan jáne ashyq túrde 2 myń teńgesin alyp ketken. Qylmystyq kodekstiń «Qaraqshylyq» baby boıynsha tergeý júrip jatyr. Kúdiktini anyqtaý is-sharasy qolǵa alyndy», - dep habarlady oblystyq PD baspasóz qyzmeti.
