Aqtóbede Belarýs lıft zaýytynyń fılıaly ashylady
AQTÓBE. QazAqparat - Aqtóbede jýrnalıst Aızat Ábdisamattyń óliminen soń lıftter túgel tekserildi. Aqtóbe qalalyq ákimdigi lıftterdi jańartý úshin Belarýstaǵy lıft zaýytynyń fılıalyn ashpaq, dep habarlaıdy QazAqparat tilshisi.
Aqtóbe qalasy boıynsha 800-den astam kópqabatty úıde lıft bar. Barlyǵy 34 lıft óz jumysyn toqtatqan. Al 282 lıfttiń paıdalaný merzimi ótip ketti. Qala ákimi Іlııas Ispanovtyń aıtýynsha, ótken jyly qalalyq bıýdjetten 40 mıllıon teńge bólinip, eski lıftter aýystyryldy.
«Bıyl eski lıftti aýystyrý úshin 75 mıllıon teńge bólinip otyr. Aqtóbelik delegat Belarýstaǵy lıft zaýytyna baryp, kelisimshart jasady. Aldaǵy ýaqytta fılıalyn ashamyz nemese lıft jınaqtaıtyn oryn óz jumysyn bastaıdy. Sol kezde lıft baǵasyn 1 mıllıon teńgege arzandata alamyz. Barlyq jumys lıft isten shyqqan kópqabatty úı turǵyndarymen birge atqarylady. Bıýdjetten aqsha bólinedi, biraq turǵyndar jyldar boıy tólep, qarjyny qaıtarýy tıis», - dedi qala ákimi Іlııas Ispanov.
Eske salsaq, jýrnalıst Aızat Ábdisamat lıftke qysylyp, kóz jumdy. Osy oqıǵadan keıin arnaıy komıssııa qurylyp, lıftterdiń tehnıkalyq jaǵdaıy tekserildi. Al taıaýda lıftke jaýapty memlekettik qyzmetkerdiń isi Ádep keńesinde qaraldy.
