Aqtóbede baýyr men búırek aýystyrý boıynsha elýinshi operatsııa jasaldy

AQTÓBE. QazAqparat - Aqtóbede sońǵy 4 jylda baýyr men búırek aýystyrý boıynsha 50 ota jasaldy, dep habarlaıdy QazAqparat tilshisi.

Aqtóbelik dárigerler búırek aýystyrý otasyn ózderi jasaıdy. Al baýyr aýystyrý koreıalyq áriptestermen birge júrgiziledi.

«2014 jyldan bastap Aqtóbe oblysynda organdardy transplantatsııalaý baǵdarlamasy tabysty oryndalyp keledi. Kóp jaǵdaıda donor naýqastyń týystary bolyp keledi. Jaqynda Aqtóbede búırek transplantatsııasynyń kezekti operatsııasy júrgizilip, onda naýqastyń qaryndasy donor boldy. Bul - Aqtóbe jerinde jasalǵan elýinshi ota. Sońǵy jyldary Aqtóbe dárigerleri búırekti transplantatsııalaý boıynsha 38 operatsııa, baýyrdy transplantatsııalaý boıynsha 12 operatsııa jasady»,- dep habarlady oblys ákiminiń baspasóz qyzmeti.

Aıta keteıik, Elbasy Nursultan Nazarbaevtyń tapsyrmasy boıynsha Aqtóbede medıtsınalyq klaster quryldy. Medıtsınalyq klasterdiń arnaıy jospary daıyndaldy.