Aqtóbede baý-baqsha ujymdaryndaǵy elektr jelisin ákimdikke ótkizý jumysy uzaqqa sozylyp ketti
AQTÓBE. KAZINFORM — Byltyr 35 saıajaı aýmaǵyndaǵy jeli qala ákimdigine ótti. Turǵyndar ótinish aıtqanymen, menshik ıeleriniń keıbiri jelini ákimdikke berýge asyqpaıdy.
Aqtóbe qalasynyń irgesindegi «Avtomobılıst» baý-baqsha ujymyndaǵy jerdiń statýsy 2025 jyly turǵyn úı qurylysyna dep ózgertildi. Munda turatyn adamdar endi elektr jelisin jekeden alyp, ákimdikke ótkizýdi josparlap otyr.
— Baý-baqsha ujymy bolǵan soń gaz qubyrynyń jelisi de, elektr jelisi de jekeniń qolynda. Jeke bolǵan soń tarıf ádettegiden qymbat ári úı sany kóbeıgen saıyn júkteme artyp otyr. Keıde tutynýshy kóbeıip jatqanyn, ajyratatynyn aıtady. Al bólek jeligi qosylý usynysyn aıtqanda ákimdik qarjy qarastyrylyp jatqanyn jetkizdi. Bir qıyny qysy-jazy keshkilik tehnıkalardy kótermeı, jaryq jıi sónip qalady. Sol kezde elektrık mamanǵa qosymsha qarjy jınaımyz. Tehnıkalarymyz da jıi isten shyǵady, — dedi «Avtomobolıst» baý-baqsha ujymynyń turǵyny Turar Otarov.
Turǵyndar 2019 jyly óz qyzmetin usynǵan jeke kásipkerge 100 000 teńgeden jınap berdi. Transformator qondyrýǵa qaıta qarjy surady. Biraq turǵyndar oǵan senbedi. Ýaqyt óte kele jumysty qaıta jalǵastyrýdy oılaǵan turǵyndar baǵanalardyń jaramsyz ekenin bildi. Jumysty qaıta bastaý kerek.
— Jaryq jıi sónedi. Keıde 5-8 saǵat bolmaı qalady. Qysta óte qıyn. Bir janyp, bir sónip turǵan soń tehnıkamyz da jıi buzylyp, iske aspaı qalady, — dedi Sáken Saǵyn.
Al Gúlsara Tóreshovanyń aıtýynsha, jyl saıyn baǵalardaǵy jaryq ulǵaıyp, qaýip tóndirip tur.
Aqtóbe qalasy ákiminiń baspasóz qyzmetiniń habarlaýynsha, «Avtomobılıst» baý-baqsha ujymyndaǵy turǵyndarymen arada birneshe kezdesý ótti. Qalalyq turǵyn úı-kommýnaldyq sharýashylyq bólimi jergilikti halyqpen birge transformatordy balansqa alý máselesin talqylady.
— Elektr jelisi jekeniń menshiginde. Baý-baqsha ujymynyń tóraǵasy ony qalanyń menshigine ótkizýden úzildi-kesildi bas tartty. Turǵyndar men tóraǵa arasyndaǵy daýly máseleler zań aıasynda sheshilýi tıis. Ony mamandar turǵyndarǵa túsindirdi. Osyǵan qaramastan mamandar aýmaqty sapaly elektr jelisimen qamtý joldaryn zerdeledi. Nátıjesinde qurylys bólimi «Aqtóbe qalasy Aqjar-2 turǵyn alaby Vzryvprom, Avtomobılıst ATP PGO (ekinshi kezek)» dep atalatyn joba jasatyp jatyr. Jobalaýshy jumysyn aıaqtap, jaqyn arada memlekettik saraptamadan ótkizýge tapsyrady. Oń nátıjesin alǵannan keıin jobany júzege asyrý úshin qurylys-montaj jumystaryna bıýdjetten qarajat suralady. Bul joba júzege asyrylǵannan keıin osy aýmaqtaǵy eldi mekender sapaly elektr qýatynmen qamtylady, — dep habarlady Aqtóbe qalasy ákiminiń baspasóz qyzmeti.
Elektr jelisi ıesiz qalǵan jáne jelini ákimdikke tapsyrýǵa nıet bildirgen baý-baqsha ujymdarynyń ótinishi qarastyrylady. Byltyr 35 ujymdy elektrmen qamtyp otyrǵan transformatordy óz ákimdik balansyna alyp, keıin jumysty elektr jetkizýshi kompanııaǵa tapsyrdy.
— Baý-baqsha ujymdary tóraǵalarynyń kópshiligi jeke menshigindegi nysandardy qalaǵa ótkizýden bas tartady. Al ıesizderin turǵyndar ózderi aryzdanyp, tapsyrýy tıis. Oǵan ýaqyt kerek. Nysandy ıesiz dep resmı taný úshin sotqa beredi. Bir jyldyń ishinde ıesi anyqtalmaǵan jaǵdaıda ǵana sot qalanyń balansyna ótkizýge sheshim shyǵarady, — dep habarlady Aqtóbe qalasy ákiminiń baspasóz qyzmeti.
Aıta keteıik, elimizde 2027 jylǵa qaraı elektr energııasyna ishki qajettilik tolyq jabylady.