Aqtóbede baý-baqsha turǵyndary elektr qýatyn tym qymbatqa satyp alyp otyr
AQTÓBE. KAZINFORM — Aqtóbe qalasyndaǵy baý-baqsha ujymynyń turǵyndary elektr jelisin balansqa alyp, tarıfti zań aıasynda retteýdi surady.
Aqtóbe qalasy aýmaǵyndaǵy baý-baqsha ujymdarynyń turǵyndary elektr qýatynyń ár kVt 18-20 teńge tóleıdi.
Qarapaıym turǵyndar 14,88 teńge tólep otyr.
Halyq elektr togyn jetkizýshi «Energosıstema» JShS-ine tarıfti kótermeı, jelilerdi balansqa alýdy surady.
— Biz jelini balansqa alsa deımiz. Sebebi jaryq sónip qalǵanda elektrık maman jaldaýymyz kerek. Sonymen birge jelide joǵaltý bolsa, ony biz bólip tóleýimiz. Biz eki jyldan beri osy máseleni kóterip júrmiz. Árqaısysymyzǵa jeke shot berse, ol da jaraıdy, — dedi baý-baqsha ujymynyń tóraǵasy Saırambek Aımaǵambetov.
Aqtóbe oblysy turǵyndaryna elektr togyn tasymaldap otyrǵan «Energosıstema» JShS qazir saıajaı aýmaǵyndaǵy úılerdi balansqa alý qarastyrylmaǵanyn jetkizdi.
Seriktestiktiń atqarýshy dırektory Marat Amanǵalıevtiń aıtýynsha, qazirdiń ózinde kompanııa jylyna 247 mln kVt/saǵ satyp alyp otyr.
— «Energosıstema» JShS balansynda 15 myń shaqyrymǵa jýyq jeli bar. Sonymen birge 1700 shaǵyn stansa, transformator qarastyrylǵan. Bizdiń tarıfimiz soǵan eseptelgen. Bizdiń ózimiz jylyna 247 mln kVt/saǵ satyp alamyz. Bul joǵaltqan elektr togynyń ornyn toltyrýǵa jasalǵan amal. Sol sekildi turǵyndar da jarty jolda joǵalǵan elektr qýatynyń aqshasyn bólip tóleıdi. Máselen men dúkenge nan alýǵa barsam, olar aqsha suraıdy, bolmasa bermeıdi. Eger bir adamnyń úıinde taratýshy qurylǵy tursa, sizden 60-70 adam elektr togyn alasa, bári birigip, shyǵyna jaýapty. Orta joldan bireý urlap, jasyryn alsa, onyń da shyǵyny teń tólenedi. Baý-baqsha ujymdaryndaǵy jelini jóndeýge bizde qarjy qarastyrylmaǵan. Bizdiń ózimizdiń jumysymyz ben shyǵymyz ǵana eseptelgen. Baý-baqshanyń sanaýlysyn ǵana aldyq. Iesiz dep tanylyp, turǵyn úı-kommýnaldyq sharýashylyq balansyna alynǵany da bar, — dedi Marat Amanǵalıev.
Qoǵamdyq qabyldaý ótkizgen oblys ákiminiń orynbasary Ǵalymjan Eleýov baý-baqsha ujymdaryndaǵy elektr jelisin tekserip, balansqa alý jumysy qolǵa alynǵanyn aıtty.
Eske salsaq, borandy kúni Aqtóbede 50-den astam aýylda jaryq sóndi.
Aqtóbe qalasy boıynsha baý-baqsha ujymdaryndaǵy elektr togyn jóndeý qıynǵa soǵyp, turǵyndar óz narazylyǵyn bildirdi.
