Aqtóbede basyna muz túsken 6 jastaǵy bala qaza boldy
AQTÓBE. QazAqparat - Aqtóbeniń Yrǵyz aýdany Aqshı aýylynda 6 jastaǵy balanyń basyna muz túsip, mert boldy, dep habarlaıdy QazAqparat tilshisi.
Aqshı aýylynda qaıǵyly oqıǵa tirkeldi. Sý munarasynyń janynda júrgen 6 jastaǵy balanyń basyna muz túsip, ol oqıǵa ornynda qaza bolǵan.
«Bala 27 qańtar kúni 6 jasqa tolǵan eken. Ókinishke qaraı, sol jerde qaza boldy. Aýrýhanaǵa tek saraptama jasatý úshin ákeldi. Ashyq bas-mı jaraqatyn alǵan balanyń oqıǵasy qaıǵyly jaǵdaı bolyp tirkeldi», - dedi Yrǵyz aýdandyq aýrýhanasy bas dárigeriniń orynbasary Gúlaıym Maldyǵulova.
Aıta keteıik, Aqshı aýyly aýdan ortalyǵynan 18 shaqyrym qashyqtyqta ornalasqan.
