Aqtóbede basseınge baratyn balalardyń denesi bórtip, aýyra bastady

AQTÓBE. QazAqparat – Aqtóbedegi eń úlken basseınde jattyǵatyn balalardyń ata-analary shaǵym aıtyp, kómek surady. Sońǵy kezderi jas sportshylardyń ústine bórtpe shyǵyp, jıi jóteletin bolyp aldy, dep habarlaıdy QazAqparat tilshisi.

Aqtóbedegi«Dostyq» sý sporty túrleri boıynsha oblystyq balalar men jasóspirimder sport mektebinde 800 bala tálim alady.

Munda bir mezette 250 balanyń shynyǵýyna múmkindik jasalǵan.

Alaıda ata-analar balalarynyń densaýlyǵy shyńdalmaı, kerisinshe aýrýshań bolǵanyn aıtyp shaǵymdandy.

«Sport mektebine balamdy ákelemin. Sońǵy kezderi ústine bórtpe shyǵyp ketedi. Biz áý basta tamaqtan kórip, mán bermegenbiz. Keıin jan-jaqtan surastyryp, ózge balalardyń da dál osy jaǵdaıǵa tap bolǵanyn bildik. Bizdiń oıymyzsha, sýǵa shamadan tys kóp hlor quıady. Tekserip, naqty jaýap bergenin qalaımyz», - deıdi Arman Qutttybaev.

Sońǵy kezderi balalarynyń shaǵymy jıilegenin aıtady ata-analar. Biri kózi ýdaı ashysa, keıbiri loqsyp, tynysy tarylady.

Al jótel sýyq tıgennen emes, allergııadan bolýy múmkin.

«Basseınge eki qyzymdy ákelemin. Hlordyń ıisi qolqany qabady. Balalar sýǵa júzgende kózi ýdaı ashyp, jattyǵýdan keıin uzaq jóteledi. Bul dabyl qaǵatyn jaıt dep oılaımyn», - deıdi qala turǵyny Maqsat Erǵalıev.

«Dostyq» sý sporty túrleri boıynsha oblystyq balalar men jasóspirimder sport mektebindegi shaǵymnan soń epıdemıolog mamandar sýdan synama alady.

«Biz jan-jaqty tekseris júrgizemiz. Oblystyq sanıtarııalyq-epıdemıologııalyq baqylaý departamentiniń mamandary arnaıy kelip, sýdan synama alady. Qospanyń áseri bar ma? Ǵımarattaǵy aýa baptaǵysh istep tur ma? Bári egjeı-tegjeıli zertteýdi qajet etedi», - dedi oblystyq dene shynyqtyrý jáne sport basqarmasy basshysy Evgenıı Goncharov.

Aıta keteıik, sý sporty kesheninde haýyzdaǵy sýdy jylyna bir ret arnaıy qospamen zalalsyzdandyrady.

Arnaıy reagentti memlekettik satyp alý konkýrsynda utyp alǵan kompanııa jetkizedi.