Aqtóbede baspanasyz qalǵan kenshilerdiń janaıqaıy jergilikti bılikke jetti
AQTÓBE. QazAqparat - Aqtóbe oblysy, Hromtaý qalasynyń 300-ge jýyq turǵyny apatty dep tanylǵan jataqhanadan shyǵarylyp jatyr. Jergilikti bılik olarǵa Qazaqstan ıpotekalyq kompanııasy arqyly páter alýdy usyndy, dep habarlaıdy QazAqparat tilshisi.
Aqtóbe qalasy Hromtaý aýdanyndaǵy Dóń ken baıytý kombınatyna tıesili jataqhanada turatyn adamdar apatty dep tanylǵan baspanadan shyǵarylyp jatyr. Buǵan deıin habarlaǵanymyzdaı, kenshiler, jalǵyzbasty analar men zeınetkerler qonystanǵan 5 qabatty jataqhana turǵyndary óz narazylyqtaryn bildirip , eshqaıda ketpeýge bekingen bolatyn.
Qazirgi ýaqytta daý Aqtóbe oblysy ákimdigine jetip, jergilikti bılik turǵyndarǵa Qazaqstan ıpotekalyq kompanııasy arqyly páter alýdy usyndy.
«Qurylysshy» jataqhanasy Dóń ken baıytý kombınatyna tıesili. Ol jataqhanada 103 bólme bar. Qazirgi ýaqytta 53 bólmeniń adamy jataqhanany bosatty, ózgesin kóshirý jumystary júrgizilip jatyr. Jataqhana apatty jaǵdaıda, 50 jyl buryn salynǵan. Bólmeni bosatqan adamdarǵa máseleni sheshýdiń birneshe joly usynyldy. Jumyssyzdary eńbekke aralasa alady. Jumys istep júrgenderi jalaqysy joǵary qyzmetke usynylady. Sonymen qatar, jataqhanadan shyǵarylǵandardy Qazaqstan ıpotekalyq kompanııasy arqyly páter alýǵa shaqyramyz. Qazirgi kúni 5 adam páter aldy»,- dedi Aqtóbe oblysy ákiminiń orynbasary Qaırat Bekenov.
Aıta keteıik, Hromtaý aýdanynda jaldamaly páter baǵasy 30 paıyzǵa artty. Degenmen bul másele Aqtóbe oblysynyń ákimi Berdibek Saparbaevtyń baqylaýyna alynǵan.
«Taǵy da Hromtaý aýdanyna baryp, turǵyndarmen kezdesý ótkizemin. Árqaısysyn tyńdap, máseleniń sheshimin suraımyn. Olardy bir kúnde shyǵaryp jibere almaımyz»,- dedi Qaırat Bekenov.
