Aqtóbede baspanalary sýǵa ketken adamdar mektepterge ornalastyryldy

Aqtóbe qalasynda sý tasqynyna baılanysty tótenshe jaǵdaı jarııalanyp, baý-baqsha ujymdaryndaǵy adamdardy evakýatsııalaý jumystarynyń júrip jatqany týraly buǵan deıin habarlaǵan bolatynbyz . 

Qazirgi ýaqytta Áýe qalashyǵy aýdanyndaǵy «Avıator», «Gosvedset», «Geolog», «Aqsút» baý-baqsha ujymdaryna qonystanǵandar №15 orta mektepke jetkizildi. Bul jerde 61 adam bar. Alǵashqy kúni týma-týystaryn jaǵalap, ýaqytsha pana izdegender qazir mektepke qaıta oralyp jatyr.

 

«Bir kún boıy týysymyzdyń úıinde boldyq. Jaqyn adam bolǵanymen bireýdiń úıinde uzaq jata almadym. Keıin eki balam, kúıeýimmen birge mektepke kelip, ornalastyq. Kúıeýim qazir úıdi qaraýǵa ketti. Keshke keledi. Munda ystyq tamaq bar. Qoldan keler basqa amal joq, tek kútemiz», - dedi Kenjegúl Áýezova.

Baspanasyn tastap, topan sýdan tek ózderin aman alyp shyqqandar arasynda І top múgedegi de bar. Eki ret ınsýlt alǵan Erbolat Jámıev osydan on jyl buryn saman kirpishten úı salyp, kóktemdegi tasqyn kezinde baspanasy qulap qalǵan. Jańa baspanany shpal aǵashtan salyp aldy. Ol da sýǵa lyq tolyp, dúnıe-múlkiniń bári sý ishinde qaldy.

 

«Mektepte panalaǵanymyzǵa eki kún boldy. Otyramyn tek. Esh qozǵalmaımyn. Alǵashqy kúni qaryndasymnyń úıine bardym. Qazir eki balamdy ertip, mektepke keldim», - deıdi E.Jámıev. 

№15 orta mekteptegi ahýaldy qala ákimi Іlııas Ispanov qarap shyǵyp, múgedek adamdarǵa bólek bir bólme berýge ýáde bergen. Mektep ishine qonystanǵandarǵa medıtsınalyq kómek te kórsetilip jatyr. Kóbiniń qan qysymy kóterilip, júıkesi syr bergen.

 

«Áýe qalashyǵy aýdanyndaǵy baý-baqsha ujymynda turatyndardyń bári №15 mektepke jetkizilip jatyr. Evakýatsııalanǵandar arasynda qan qysymynyń kóterilýi tirkeldi. Bas aýrý da bar. Munyń bári júıkege túsken kúshten boldy. Medıtsınalyq kómek jan-jaqty kórsetilip jatyr. Dáriger men eki medbıke kezekshilikke qoıyldy. Túnde de kezekshi bolady. Jaǵdaı qıyn bolsa, jedel járdem shaqyrylady. Bul jerge mekteptiń, emhananyń psıhologtary da kelip, psıhologııalyq kómek kórsetiledi. Adamdardyń jaǵdaıy birqalypty. Olar ózderi turyp jatqan jerdiń sýǵa ketetinin bilgen», - dedi Áýe qalashyǵyndaǵy konsýltatıvtik-dıagnostıkalyq ortalyq dırektory Aıgúl Bıjanova.

Onyń aıtýynsha, mektepke jetkizilip jatqan adamdardyń kóbi esh jerde tirkeýde joq. Tipti, aýdannan kóship kelip, jumyssyz júrgender kóp.

 

Al mektep dırektory Nurgúl Baızııazova baý-baqsha ujymynan evakýatsııalanǵan adamdarǵa kásipkerler, qarapaıym adamdardyń kómektesip jatqanyn aıtyp otyr.

«Mektepte 61 adam bar. Olar 23 otbasynyń adamdary. Qaýipsiz jerge kóshirilgenderdiń 16-sy bala. Mektep qyzmetkerleri, polıtsııa, dárigerlerden qurylǵan top kezekshilik uıymdastyrdy. Ashana ashyq, úsh mezgil tamaq berilip jatyr. Bir bóligi dúkenge ketti. Olar adamdarǵa qajetti turmystyq zattar ákeledi. Munda bári bar. Halyqtyń bar oıy sýǵa ketken úılerinde. Sony ýaqymdap, alańdap, kúndiz qarap keledi», - dedi Nurgúl Baınııazova.