Aqtóbede baspanaǵa muqtaj azamattarǵa arnap jóndelgen úıdiń esik-terezesi qırap qaldy
AQTÓBE. KAZINFORM — Bes qabatty jataqhanany jóndep, tolyqqandy páter retinde qoldanysqa bermek bolǵan depýtattar sottalyp ketti. Qazir sol úıdiń esik-terezesiniń bir bóligi qırap qaldy.
Aqtóbe oblysy Muǵaljar aýdany Qandyaǵash qalasyndaǵy № 40 úıdiń terezesindegi áınekteri shaǵylǵan. Sonymen birge syrtqy temir esigi de qırap qalǵan. Qazir munda kez kelgen adam kirip, ishin erkin aralaıdy. Jergilikti ákimdik bolsa Jastyq shaǵyn aýdanyndaǵy úı qaıta jóndelip, keıin turǵyn úıge muqtaj azamattarǵa beriletinin aıtty.
— Sot sheshimi shyǵyp, ǵımarat Muǵaljar aýdandyq sáýlet jáne qala qurylysy bólimine qaıta berildy. Qazirgi ýaqytta nysan boıynsha qajetti qujattar ázirlenip, aqaý aktisi jasaldy. Aqaý aktisinde ǵımarattyń terezeleri, esikteri, tóbesi jáne ishki bólikterindegi zaqymdanǵan elementter kórsetildi. Qazir smetalyq qujattama ázirlenip jatyr. Qujattar daıyn bolǵannan keıin bıýdjet qarajaty esebinen jóndeý jumystaryn júrgizý josparlanyp otyr. Odan keıin bul úıdi turǵyn baspanaǵa muqtaj azamattarǵa berý kózdelgen, — dedi Muǵaljar aýdany ákiminiń orynbasary Jomart Baqytgeldi.
Ákimdiktiń habarlaýysha, esikti birneshe jóndegenimen, ony úshinshi ret qaıta buzǵan.
— Bul úı bolashaqta turǵyndardyń ıgiligine beriletin nysan. Sondyqtan turǵyndardan ǵımaratqa uqypty qaraýdy suraımyz. Terezesin syndyrý, ishine qoqys tastaý nemese múlikke zııan keltirýge bolmaıdy. Bul jerde aldaǵy ýaqytta turǵyn úıge muqtaj qanshama otbasy ómir súredi. Aldaǵy ýaqytta ǵımarattyń qaýipsizdigin qamtamasyz etý úshin beınebaqylaý kameralaryn ornatý máselesi de qarastyrylýda, — dedi aýdan ákiminiń orynbasary.
Eske salsaq, Muǵaljar aýdandyq máslıhatynyń tóraǵasy Baqytjan Qadralın, aýdandyq máslıhat depýtaty Azamat Jálimbetov jáne Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshy Ánes Seıilhanǵa «Alaıaqtyq», «Qylmystyq jolmen alynǵan aqshany jáne ózge de múlikti zańdastyrý» baptary boıynsha sottaldy. Máslıhat tóraǵasy qyzmetin atqarǵan sottalýshynyń 5 qabatty jataqhanany satyp alyp, keıin ony áıeline syıǵa bergen, artynsha óz atyna qaıta jazdyrǵan. Sóıtip jataqhanaǵa jóndeý jumystaryn júrgizý úshin memlekettik satyp alýǵa qatysyp, 672 mln teńgeden astam shyǵyn keltirdi.
