Aqtóbede basqarma basshysy para alǵan qyzmetkeri úshin uıaldy

AQTÓBE. QazAqparat - Memlkettik qyzmet isteri jáne sybaılas jemqorlyqqa qarsy kúres is-qımyl agenttiginiń oblystyq departamenti aýyl sharýashylyǵy qyzmetkerlerin tártipke shaqyrdy. Memlekettik qyzmetkerler 20 myń teńge para alǵan áriptesiniń áreketin kórdi, dep habarlaıdy QazAqparat tilshisi.

Memlekettik qyzmet isteri jáne sybaılas jemqorlyqqa qarsy kúres is-qımyl agenttiginiń oblystyq departamenti, Ulttyq bıýronyń oblystyq departamenti memlekettik qyzmetkerlerge para alýdyń nemen aıaqtalatynyn túsindirdi. Shara kezinde Aqtóbe oblystyq aýyl sharýashylyǵy basqarmasynyń bólim basshysy para alǵan sátte túsirilgen beınerolık kórsetildi. Bul barlyq qyzmetkerlerge sabaq bolatyn derek. Al basqarma basshysy Qusaıyn Sársenbaı uıalyp otyrǵanyn jetkizdi.

«Biz yqpal ete almaǵanymyzǵa ókinemiz. Degenmen aldaǵy ýaqyta máseleniń aldyn alý úshin jumys isteımiz. Bólim basshysyna tártiptik shara qoldanamyz. «Bir qaryn maıdy, bir qumalyq shiritedi» demekshi, osyndaı jaǵdaı bolyp qaldy», - dedi Aqtóbe oblystyq aýyl sharýashylyǵy basqarmasynyń basshysy Qusaıyn Sársenbaı.

Para alý deregi 23 naýryz kúni tirkelgen. Bas maman traktorshylarǵa qajetti júrgizýshi kýáligin alatyn adamdarǵa emtıhan paraqshasyn kedergisiz daıyndap otyrǵan.

«Bıyl 23 naýryzda sybaılas jemqoryqqa qarsy kúres departamenti aýyl sharýashylyǵy basqarmasynyń bas mamanyn ustady. Memlekettik qyzmetker traktor júrgizýshisine qajetti kýálik alýǵa arnalǵan emtıhan paraǵyn kedergisiz berý úshin oblys turǵynynan 20 myń teńge alǵan. Zań boıynsha ol adam emtıhan tapsyryp, synaqtan ótýi shart. Biraq bas maman T.Ótegenov bul kederginiń bárin ózi sheship, qyzmeti úshin aqsha aldy. Ol birneshe ret emtıhan paraǵyn toltyryp bergen», - dedi Sybaılas jemqorlyqqa qarsy Ulttyq bıýro departamentiniń tergeýshisi Dáýren Aldanııazov.