Aqtóbede barlyq jumysshynyń jalaqysy 10 paıyzǵa kóterilýi tıis - Saparbaev
AQTÓBE. QazAqparat - Aqtóbedegi óndiris oryndary men kez kelgen shaǵyn jáne orta bıznes ıesi jumysshylarynyń jalaqysyn kem degende 10 paıyzǵa ósirýi tıis. Aqtóbe oblysynyń ákimi Berdibek Saparbaev arnaıy komıssııa bul tapsyrmanyń oryndalýyn baqylaıtynyn jetkizdi, dep habarlaıdy QazAqparat tilshisi.
Aqtóbe oblysynda jumysshylardyń jalaqysyna monıtorıng júrgiziledi. 2017 jyldyń alǵashqy aılarynda jumys berýshilerdiń qaryzy 780 mıllıon teńgeni qurady. Al jyl qorytyndysynda 16 mıllıon teńge qaryz qaldy. Qazirgi kezde oblys ákimdigi men memlekettik kirister departamenti birlese jumys júrgizip jatyr. Bankrot bolǵan kásiporyndardyń múlki satýǵa shyǵaryldy.
«Arnaıy top jumysshylardyń jalaqysyn kóterýge qatysty jumys istep jatyr. Qazirgi kezde 53 óndiris orny 7-20 paıyz aralyǵynda óz eńbekkerleriniń jalaqysyn kóterýge kelisim berdi. Kezdesý áli de júrip jatyr. Ásirese qarapaıym jumysshylarǵa basymdyq beremiz»,- dedi Aqtóbe oblysy ákiminiń orynbasary Qaırat Bekenov.
Aıta keteıik, oblys ákimi Berdibek Saparbaev iri óndiris oryndarynyń basshylarymen kezdesip, eńbekaqyny kóterý máselesin qoıdy.
«Eńbekaqyny kóterý - Prezıdent tapsyrmasy. Ár óndiris orny, shaǵyn jáne orta bıznes jumysshylarynyń jalaqysyn kem degende 10 paıyzǵa kóterýi tıis. Bul óndiris, qurylys, kólik salasyna da qatysty eskertý. Jumys toby bárin baqylap, ósim joq kompanııaǵa tıisti shara qoldanýy kerek»,- dedi oblys ákimi B.Saparbaev.
Esep boıynsha bıyl óńirde jumys isteıtin 253 myń adamnyń jalaqysy kóteriledi. Sonymen qatar, áleýmettik dúkenderdiń jumysy jandanyp, taýar óndirýshilermen baǵany turaqty ustap turýǵa kelisimi jasalady.
«Kommýnaldyq qyzmetterdiń tólemi ósti. Aqpan aıynan bastap aqyly qyzmetter de baǵany ósirýi múmkin. Sondyqtan Turaqtandyrý qorynyń qyzmetin kúsheıtip, ónim óndirýshiler arasyndaǵy memorandýmdardy jalǵastyrý kerek»,- dedi Aqtóbe oblysy ákiminiń orynbasary Asqar Bıahmetov.
