Aqtóbede barlyq baǵyttaǵy jol jabyldy
AQTÓBE. QazAqparat – Aqtóbe oblysynda barlyq baǵyttaǵy jol ýaqytsha jabyldy. Qazir óńirde aqtútek boran, dep habarlaıdy QazAqparat tilshisi.
Respýblıkalyq mańyzy bar Samara-Shymkent tasjoly Marjanbulaq aýylynan Qobdaý aýdanyna deıin, Bekqul baba aýylynan Hromtaý qalasyna deıin, Hromtaý qalasy men Qyzylorda oblysynyń shekarasy aýmaǵy jabyq. Qarabutaq-Komsomolskoe-Qostanaı oblysynyń shekarasy, Aqtóbe-Atyraý- Astrahan tasjolynyń Alǵa qalasynan Atyraý shekarasy arasyna deıin, Aqtóbe qalasyndaǵy Soltústik aınalma joly, Qandyaǵash-Embi-Shalqar-Yrǵyz, Aqtóbe – Mártók – Orynbor shekarasy aralyǵy, Aqtóbe men Orsk shekarasy jabyq.
Oblystyq mańyzy bar joldar boıynsha Shubarqudyq – Oıyl – Qobda - Sol-Iletsk tasjolynyń Shubarqudyq kentinen Oıyl aýylyna deıin, Oıyl kentinen Samara-Shymkent avtojolyna deıin, Qobda aýylynan RF shekarasyna deıin kólikter júrmeıdi. Aqtóbe – Orsk tasjolynyń Dóń – Badamsha aýyly aralyǵy, Pokrovka-Temir-Keńqııaq-Embi aralyǵynda júrýge tyıym salyndy.
«23 qańtarda túnde Aqtóbe oblysynyń keı jerlerinde qar jaýady. Keı jerlerinde kóktaıǵaq, baıaý burqasyn bolyp, ońtústik-batystan soǵatyn jeldiń ekpini 15-20 m/s jetedi», - dep habarlady oblystyq TJD baspasóz qyzmeti.
