Aqtóbede Baqytty Bala halyqaralyq vokal konkýrsy bastaldy
7 tamyz kúni Aqtóbedegi «Green Land» demalys ortalyǵynyń saıabaǵynda Baqytty Bala baıqaýynyń qatysýshylarymyn tanysý keshi ótti.
Balalar ózderi týraly, súıikti isteri jóninde oı bólisti. Shet elden kelgen qatysýshylar Dımashtyń týǵan jeri qushaq jaıa qarsy alǵanyna qýanyshty ekenin aıtty.
Aqtóbede kópten kútken Baqytty Bala balalar vokaldyq baıqaýynyń ІІІ maýsymy bastaldy.
6-7 tamyz aralyǵynda baıqaýǵa el aýmaǵy men shet elderden qatysýshylar keldi.
Olardy festıval uıymdastyrýshylarymen birge BAQ ókilderi de erekshe qurmetpen qarsy aldy.
Tanysý keshinde jas vokalıster kútip alýdyń ózi erekshe áser qaldyrǵanyn aıtyp jatty.
Jas ónerpazdar ózderin «juldyz» sezinip, boıyna senim uıalaǵan, bul máńgi esten ketpes sát, deıdi olar.
7 tamyz kúni festıval rejısseri Anna Oboıanskaıanyń jetekshiligimen «Óner ortalyǵy» kontsert zalynda alǵashqy daıyndyq ótti. Balalar sahnanyń ásemdigi, keńdigi men zaldyń erekshe akýstıkasyna tańdanyp jatty.
Daıyndyqtan keıin «Green Land» demalys saıabaǵynda yńǵaıly tanysý keshi ótti, onda qatysýshylar bir-birin jaqynyraq bile tústi.
Ǵazıza Jubanova atyndaǵy Aqtóbe fılarmonııasynyń qyzmetkeri – Nurjan Orazov pen «Aqtóbe» telearnasynyń tilshisi Arýjan Qarataeva keshti kóńildi, erkin atmosferada ótkizip balalarǵa qýanysh syılady.
Grekııadan kelgen qatysýshy Sofııa Salvarıdý tanysý barysynda qazaqtyń qonaqjaılylyǵy qatty tań qaldyrǵanyn aıtsa, Reseıden kelgen qatysýshylar Mılan Ponomarenko (Máskeý) men Anna Glotova (Ekaterınbýrg) ulttyq taǵam baýyrsaq pen shubat usynyp qarsy alý erekshe áser etti, deıdi.
Tanystyqtan soń balalar Baqytty Bala bannerine estelik úshin óz qoltańbalaryn qaldyryp, tilek bildirdi.
Kóńili jaıdary balalar keıin voleıbol men badmınton oınap, sýretke túsip, bı bılep, án aıtty.
ІІІ maýsym qatysýshylarynyń bir-birimen ońaı til tabysqanyn baıqaı otyryp, olar da aldyńǵy maýsym qatysýshylary sekildi eń jaqsy dostyq ornatady degen qorytyndy jasaýǵa bolady.
